Accessibility links

җомга, 9 декабрь 2016, Казан вакыты 05:10

Sişämbe könne Qazanda uzdırılğan räsmi çaralarğa küzätü...


Sişämbe könne Qazanda Mintimer Şäymiev däwlät büläkläre- orden medal’lär, maqtawlı isem birelü turında tanıqlıqlar tapşırdı. Maqtawlı isemnär aluçılar arasında mädäniät xezmätkärläre baytaq. “Qazan” biü ansamble baletmeysterı Fänis İsmäğilevkä “Tatarstannıñ atqazanğan sänğät eşleklese”, Qazan däwlät konservatoriäse professorı Älfiä Burnaşevağa “Rusiäneñ atqazanğan sänğät eşleklese” isemnäre tanıqlıqları tapşırıldı. Filologiä fänenä tonomika kebek yaña terminnar kertkän Tel ädäbiät institutı baş fänni xezmätkäre Firdäwes Ğaripovaga “Rusiäneñ atqazanğan fän xezmätkäre“ digän isem birelüe xaqında tanıqlıq tapşırıldı.

Ministrlar kabinetında da sişämbe könne jurnalist xalqı ığı-zığı kilde. Alar beryulı berniçä çara barğanğa kabinetlar, utırışlar zalları arasında çabıştılar. Premyer-ministr Röstäm Miñnexanov “Tatspirtprom“ citäkçelege belän kiñäşmä ütkärde. Kiñäşmägä töp televizion kanallarnı ğına qısqa waqıtqa kertep çığardılar. Çönki kiñäşmädä süz citdi häm kisken temağa, byudjetqa keremnär tä'min itü turında bara didelär. İrtänge yaqta atnalıq brifing ta başlandı. Başta Säwdä häm tışqı iqtisadi xezmättäşlek ministrı Xafiz Salixov häm “Tatnefteximinvestxolding” general' direktorı Rafinat Yärullin Tatarstan xökümäte delegatsiäseneñ Kön'yak Koreyağa baruı näticäläre turında söylädelär. Mäğlüm ki Röstäm Miñnexanov citäklägän bu delegatsiä vizit barışında LG International kompaniäse belän memorandum tözede. Närsä xaqında soñ? Nigezdä neft' eşkärtä xezmättäşlek. Çönki älege kompaniäneñ bu ölkädä qazanışları şaqqatqıç. LG kompaniäse barı tik çittän kertelgän neftne genä eşkärtä. Bu yılına 30 million tonna. Neftne eşkärtü däräcäse 75 protsent. Neft' eşkärtkändä etilen, polivinilxlorid kebek bik kiräkle organik materiallar citeşterü mömkinlekläre bar. Polivinilxlorid mäsälän yortlar tözegändä alıştırğısız izolyatsiä materialı ikän. Şuña kürä yaqlar memorandumnı tormışqa aşırunı ozaqqa suzmıylar. Avgust urtalarında eşlekle söyläşülär, tenderlar ütkärü kebek konkret çaralarğa kereşäçäklär.

Ministrlar kabinetınıñ atnalıq brifingınıñ ikençe öleşe Rusiädä 1nçe yüldän narkotiklar häm psixotrop matdälär äyläneşen küzätü Däwlät komitetı eşli başlawına bağışlandı. Tatarstanda da älege komitetnıñ idäräse buldırıldı häm anıñ başlığı itep politsiä general-mayorı Şamil' Däwlätgildiev bilgelände. Mäğlüm ki yaña küzätü xezmäte Rusiäneñ salım politsiäse xezmäte nigezendä qorıldı. Şamil' Däwlätgildiev Tatarstandağı baş salım politsiäse ide. Rusiädä narkotiklar häm psixotrop matdälär äyläneşen küzätü Däwlät komitetı oyıştıru säbäplären ul bolay añlattı. Yäğni Rusiädä narkotiklardan kergän faydanı legalläşterü probleması belän şöğellänü yuq däräcäsendä. Rusiä qanuni nigezlämälärneñ kamil bulmawı säbäple ul dönyada narkotabışlarnı yuu öçen iñ uñay urınnarnıñ berse bulıp qalğan. Şuña kürä narkotiklar äyläneşe belän köräşüçe xalıq-ara oyışmalar Rusiädän çaralar kürüne taläp itä. Yaña idäräneñ narkotiklardan alınğan tabışnı legalläşterügä qarşı köräşü öçen böten mömkinlekläre dä bar. Çönki Küzätü idäräsenä elekkege salım politsiäseneñ barlıq mal-mölkäte häm keşeläre qaldırılğan. Şulay da Tatarstannıñ narkotiklar häm psixotrop matdälär äyläneşen küzätü idäräse ber ay çaması oyıştıru eşläre belän mäşğül bulaçaq. İñ möhime maxsus ekspertiza laboratoriäse buldıru. Annan soñ İdärä citäkçelege yıl azağına taba konkret eşlär, näticälär bulır dip wäğdä itälär.

Yunıs Ätnäle

XS
SM
MD
LG