Accessibility links

җомга, 9 декабрь 2016, Казан вакыты 18:30

Çärşämbe könneñ köndälek yañalıqları...


Sişämbe könne Qazan kremlendä Tatarstan prezidentı Mintimer Şäymiev Rusiäneñ häm Tatarstannıñ däwlät büläklären tapşırdı. Respublika üseşenä zur öleş kertkän şäxeslär isemlegendä Rusiä Duması deputatı Färidä Ğäynullina, filolog, professor Firdäwes Ğäripova, rässam Rada Niğmätullina, respublikanıñ Yul xäräkäte iminlege däwlät inspeksiäse başlığı Rifqät Miñnexanov ta bar. Pänceşämbe, 31 yüldän isä, Mintimer Şäymievnıñ Tatarstannıñ Kama aryağına räsmi säfäre başlanıp kitäçäk. Prezident Alabuğa, Çallı şähärlärendä bulıp qaytaçaq.

Uramda qızu cäy buluğa da qaramastan, saylawlar yaqınlaşqan sayın Tatarstanda da säyäsi tormış aktivlaşa. İnde xäbär itkänebezçä, küptän tügel genä Qazanğa Uñ köçlär berlege liderlarınıñ berse İrina Xakamada kilep, respublika citäkçelege belän oçraşular, söyläşülär alıp barğan ide. 29 yüldä isä Yedinaya Rossiya säyäsi firkaseneñ Tatarstan bülekçäse Şurasınıñ utırışı uzdı. Anda ağımdağı firka eşlärennän tış, massaküläm mäğlümat çaraları belän xezmättäşlekne üsterü turında häm respublika xalıq belän eşne arttıru xaqında süz bardı. Ä menä Tatarstan Däwlät Şurası räise Färit Möxämmätşin parlament yalğa kitkännän faydalanıp üze dä yal itep alırğa bulğan. Tatar-inform agentlığı xäbärenä qarağanda, üzeneñ çirattağı yalın ul çit illärdä tügel, ä kürşelärdä - Başqortstan respublikası şifaxanäläreneñ bersendä ütkäräçäk. Sişämbedän başlap anıñ wazifaların spikernıñ urınbasarı Robert Miñnullin başqaraçaq. Çärşämbe könne Qazanda federativ mönäsäbätlärgä häm cirle üzidarä problemarına bağışlanğan seminar açıldı. Anda İdel buyı häm Ural federal’ okruglarınıñ xakimiät başlıqları häm finans oyışmalar citäkçeläre qatnaşa. Älege cıyılışnı oyıştıruçılar – Rusiäneñ Finans ministrlığı häm Tatarstannıñ Ministrlar Kabinetı. Seminarnıñ açılu cıyılışında respublikanıñ premyer-ministrı Röstäm Miñnexanov ta qatnaştı.

Sişämbe könne Qazannıñ İdel yäşlär lagerında Yäşlär ictimaği oyışmalar aktivı slyotı eşli başladı. Anda respublikanıñ här şähär häm rayonınnan, şulay uq Mordoviä respublikası, Perm’ ölkäsennän kilgän yäşlär oyışmaları liderları qatnaşa. Slyotqa cıyıluçılar yäşlär problemaların, alarnı çişüdä ictimaği oyışmalarnıñ rolen qarayaçaqlar, yäşlär säyäsäten tikşeräçäklär. Lagernıñ eş planında şulay uq törle psixologik treninglar ütkärü, tügäräk öställär uzdıru da qaralğan. Xäyer, yäşlär eş belän genä tügel, yal itü, küñel açu, sport belän dä şöğellänäçäk, dip xäbär itä İntertat agentlığı.

1 avgusttan 4nä qädär Tatarstanda İdelneñ kiläçäge: ekologiä häm sänäğät dip isemlängän Bötenrusiä jurnalistlar Assambleyası uzaçaq. Älege cıyında isä, tabiğätne saqlaw täcribäse belän urtaqlaşaçaqlar, bu eştä jurnalistlarnıñ role häm eşçänlege turında fiker alışaçaqlar. Seminar qısalarında qatnaşuçılar belän ğämäli däreslär ütkärü, ekologiä temasına yazuçı jurnalistlar arasında barğan bäyge näticälär yasaw da qaralğan.

Gölnaz İlgizär

XS
SM
MD
LG