Accessibility links

пәнҗешәмбе, 8 декабрь 2016, Казан вакыты 14:52

Prezident Bush: "üzem äytkän här närsä öçen min üzem cawap totam".


Amerika Quşma Ştatları prezidentı George Bush üzeneñ Ğiraqqa qarşı suğışnı tizräk başlarğa teläwen häm şul maqsatta wäzğiatne küpertep kürsätergä teläwen kire qağa. Ul bu xaqta, soñğı 5 ay eçendä berençe märtäbä ütkärgän zur matbuğat oçraşuwında belderde. Anıñ süzlärenä qarağanda, ul baştan uq töp maqsat itep Saddam Xösäenne xakimiattän çitlätüne quyğan bulğan.

Mäğlümat çaraları wäkilläre belän törle oçraşular häm säfärlär waqıtında daimi küreşep torsa da, amerikan prezidentınıñ Ğiraq suğışı başlanğannan birle ayırım ber zur matbuğat oçraşuwı ütkärgäne bulmadı, xörmätle tıñlawçılar. Ul inde berniçä märtäbä, jurnalistlar belän näq menä şulay oçraşunı bik oşatıp betermäwen, monı cämäğätçelek belän aralaşunıñ uñay ber yulı itep kürmäwen beldergän ide. Çınnan da prezident Bush turıdan-turı birelgän sorawlar aldında yuğalıp qala häm anıñ yış qına kiräkmägän süzlär ıçqındırıp quyu ğädäte dä yuq tügel. Aq yortqa kilgännän birle ul mondıy matbuğat oçraşuwın tuğız märtäbä genä ütkärde, bu yulı da Bush xäbärçelär belän küreşügä alar yağınnan atnalar däwamında Aq yortqa yasalğan qatı basım näticäsendä genä rizalaştı. Soñğı märtäbä şundıy üteneç belän prezidentnıñ üzenä, ul ber kön elek İzrail premyer-ministrı ozatuwında xäbärçelär qarşına çıqqaç möräcäğät itelde. Häm Aq yort soñğı minutta ğına monı qabul itep zur matbuğat oçraşuwı cıyarğa buldı. Andağı sorawlarnıñ şaqtıy öleşe Quşma Ştatlarnıñ Ğiraqtağı suğışı, aña äzerlänü çorı, amerikan ğäskäriläreneñ bügenge xäle turında buldı. Ğinwar ayında Saddamnıñ atom qoralına iä bulırğa tırışuwı xaqında Kongress qarşında belderü yasağanda, üzeneñ şikle mäğlümatqa tayanuwı mäs''äläsendä prezident Bush berençe märtäbä monıñ öçen cawaplılıqnı üz östenä aldı. Moña qädär isä ul, şul yalğış belderüneñ Üzäk küzläw idaräse CİA xatası arqasında yasaluwın äytkän ide. Çärşämbedä amerikan prezidentı "üzem äytkän här närsä öçen min üzem cawap totam, älbättä" dip belderde. Ul şulay uq, suğış başlaw qararı öçen cawaplılıqnı da üz östenä aluwın äytte. Anıñ süzlärenä qarağanda, ul şaqtıy citdi bulğan küzläw mäğlümatların tikşergännän soñ, Saddam Xösäenne xakimiattän çitläşterergä kiräk digän fikergä kilgän. "Xäzer isä, dip däwam itä Quşma Ştatlar prezidentı Bush, tänqitçelärne häm ışanmawçılarnı qänäğätländerü öçen bez dälillär tabarğa tieş, min monı bik yaxşı añlıym, häm min şuşı ezlänülärebezneñ, minem imanım kamil bulğan närsäne, Saddamnıñ qoral programması buluwın isbatlawına ışanam". Bush ğomumän amerikan ğäskärläreneñ Ğiraqta äkrenläp uñışqa ireşüwe, alarnıñ elekke diktator Saddamnı ezläw eşen däwam itüwe xaqında söyläde, çığışında ul şulay uq terrorğa qarşı köräş, ildäge häm dönyadağı iqtisadi töşenkelekkä qarşı kürelgän çaralarğa da qağıldı. Şunnan soñ 45 minut däwamında ul xäbärçelärneñ törle sorawlarına cawap birde, häm bu yulı üzen şaqtıy qıyu tottı, xätta çetrekle sorawlarğa da äzer buluwın kürsätte. Ğiraq mäs''äläsen amerikan prezidentı yaxşı ğına öyrängän kebek kürenä, üzeneñ bu ölkädäge añlatmaların ul yış qına bik ğadi formada birsä dä, anıñ üz-üzenä ışanu däräcäse yuğarı diärgä bula. Hiçyuğı, Ğiraq suğışınıñ kiräklege häm anda suğış başlap döres eş itüwe ölkäsendä...

Kärim Kamal, Praga
XS
SM
MD
LG