Accessibility links

Кайнар хәбәр

Rusiä jurnalistları Tatarstanda ekologiä turında söyläşä


Comğa könne Qazanda Bötenrusiä jurnalistları Assambleyası üz eşen başlap cibärde. 4 avgustqa qädär däwam itäçäk bu çara Rusiä ekologiäse-2002 Bötenrusiä bäygese qısalarında ütä. Şunısı qızıqlı, inde 7 märtäbä uza torğan Rusiä ekologiäse bäygese qısalarında mondıy zur jurnalistlar cıyını äle berençe märtäbä genä oyıştırılğan. Elekkege yıllarda şuşı konkursnıñ näticälären bilgeläp, tantana uzdıru belän genä çiklänä torğan bulğannar. Bäygeneñ yomğaqlaw öleşe här yılnı Rusiäneñ berär şähärendä ütä. Tatarstanda ul inde ike märtäbä uzdırılğan. Şuña da qaramastan, bıyıl da Rusiä ekologiäse konkursın oyıştıruçılar yañadan bezneñ respublikanı saylağannar. Tatarstannıñ ekologiä häm tabiği resurslar ministrlığında monı yarım şayartıp, yarım citdi itep, tatarlarnıñ qunaqçıllığı belän añlattılar.

Assambleyağa Rusiäneñ bar töbäklärennän dä diärlek 140tan artıq jurnalist, Tatarstannan isä 50dän artıq mäğlümat çaraları wäkilläre cıyılğan. Respublikanıñ ekologiä häm tabiği resurslar ministrlığı press-sekretare Natal’ya Goloburdova süzlärenä qarağanda, bu çarağa xätta Altay, Buryatiya, Xakasiya kebek töbäklärdän dä kilgännär. Cıyılışta qatnaşuçılar öçen bik bay programma da qaralğan. Jurnalistlarnı aralaşu, ekologiä temasına yazuçı tanılğan şäxeslär belän tanışu, master-klasslarda qatnaşu, tabiğätne saqlaw temasına söyläşülär kötä. Comğa könne kiçen isä, Rusiä ekologiäse-2002 bäygesendä ciñüçelärne qotlaw häm büläklär tapşıru bulaçaq. Älege tantanalı çara Qazannıñ iñ tanılğan cirläreneñ bersendä – Piramida küñel açu üzägendä uzaçaq. Monnan tış Assambleyağa cıyılğan jurnalistlarnı Tatarstan, Qazan belän tanışu, borınğı Bolğar, Bilär cirlärenä mawıqtırğıç säyäxät, respublikanıñ sänäğät şirkätläre, alarnıñ eşçänlege, älege şirkätlärneñ tabiğätne saqlaw ğämälläre belän tanışu kötä. Şulay itep, 4 avgustqa qädär jurnalistlarnı bik bay, qızıqlı programma kötä.

İnde äytkänebezçä, Rusiä ekologiäse bäygeseneñ yomğağı Tatarstanda 3 märtäbä ütkärelä. Bıyıl Bötenrusiä jurnalistlar Assambleyası Tatarstannıñ Ministrlar kabinetı niäte belän häm anıñ yärdämendä oyıştırılğan. Bu, älbättä, respublikada ekologik problemalarğa, alarnıñ çişeleşlärenä zur iğtibar birüne kürsätä. Läkin bu iğtibar şuşındıy zur çaralar ütkärügä genä tügel, ğädäti, härkönne eşlänelä torğan ğämällärgä äylänsen ide.

Gölnaz İlgizär
XS
SM
MD
LG