Bask separatçılarınıñ ETA oyışması bügen, İspaniäneñ iktisadi totrıqlılığın qaqşatuğa yünältelgän teraktlarnı däwam itäçäk, dip belderde. Häm çit il turistlarına bu ilgä kermäskä kiñäş itte. Bask ğäzetälarınıñ bersendä ETA oyışması, küptän tügel genä İspaniädä bulğan biş terakt öçen cawaplılıqnı üz östenä aluın beldergän. Ul teraktlar ilneñ törle ölkälärendä şul isäptän Andaluziä qurortlarında da oyıştırılğan ide.
