Accessibility links

Кайнар хәбәр

Aleksey Kolesnik: « Tabiğätne saqlaw ölkäsendä dä Üzäk belän töbäk arasında wäqälätlärne ayıru möhim».




Assambleyada yözdän artıq jurnalist qatnaşqanğa kürä, bu çaranıñ soñğı matbuğat oçraşuında da sorawlar küp buldı. Birelgän sorawlar isä Tatarstannıñ üz problemaları häm alarnı xäl itü ısulları xaqında ide. Mäsälän anda, Tatarstanda çüpne utilgä äyländerü niçek bara, şähärlärneñ çistalığın saqlaw, Tübän Kama su saqlağıçınıñ bieklegen kütärü, Atom elektr stansiäseneñ tözeleşen yañartu xaqında sorawlar häm cawaplar buldı. Tatarstan isemennän respublikanıñ ekologiä ministrı, tabiğätne saqlaw mäs’älälären qayğırtuçı xökümät apparatı citäkçese häm iqtisat ministrı urınbasarı jurnalistlar aldında çığış yasadı.

Anda şulay uq, Rusiäneñ tabiğät baylıqları ministrlığınıñ Tatarstan bülege citäkçese Aleksey Kolesnik ta qatnaştı häm matbuğat wäkilläre sorawlarına Tatarstan ministrı Boris Petrov belän yarışa-yarışa cawaplar birep utırdı.

Ğomum alğanda, Tatarstan wäkilläre çittän kilgän jurnalistlarğa respublikanıñ aldınğı täcribäse turında söyläde. Tatarstanda tabiğätne saqlaw mäs’äläläre alğı planğa quyıla, dielde anda. Ekologiäneñ torışın bağuçı iminlek şurasına respublikanıñ iñ yuğarı citäkçelär kerä. Ekologiä mäs’älälären çişü öçen respublika qaznasınnan şaqtıy aqça birelä. Şunıñ belän bergä sänäğät şirkätläre dä üz aqçasına çistartqıçlar, gaz, suğa fil’tr quya, qaldıqlarnı eşkärtü yağın qayğırta.

Läkin, Tatarstan xökümäte apparatı citäkçese İldar Fattaxov süzlärençä, här citäkçe dä bu mäs’älägä cawaplı qaramıy. Bu sıyfat bulsa, ütkän yılda waba çire dä kilep çıqmas ide. Şuşı şaw-şulı xällärdän soñ, ber niçä yuğarı däräcäle citäkçegä caza birelde. İldar Fattaxovnıñ äytüenä qarağanda, ekologiä mäsällärenä küz yomıp torğan başqa citäkçelärgä qarata da respublika xakimiätläre, qatğıy çaralar kürergä uylıy.

Qazannıñ ni säbäple çista bulmawına da, matbuğat oçraşuında cawap birelde. Säbäp, şähär xakimiätläreneñ uramnarda çüpne taşlamasqa, tabiğätne saqlarğa kiräk, dip xalıqqa möräcäğät itmäwendä ikän. Ekologiä torışına bağışlanğan matbuğat oçraşuında beraz säyäsät tä buldı. «Комсомольская Правда» gäziteneñ xäbärçese, ber uq qırda eşläwçe Rusiä belän Tatarstan ministrlıqlarınıñ mönäsäbätläre häm tabiğätne saqlaw kompleksında Bötenrusiä buylap alıp barıla torğan tikşerü xaqında qızıqsındı. Moña Rusiä ministrlığınıñ Tatarstan bülege citäkçese Aleksey Kolesnik bolay cawap birde:«ministrlıqlarnı tügel, ä şuşı tabiğät baylıqlarınnan faydalanuçılarnı tikşerü bara, tabiğätne saqlaw ölkäsendä dä Üzäk belän töbäk arasında wäqälätlärne ayıru möhim».

Aleksey Kolesnik şulay uq, Rusiä ministrlığınıñ da jurnalistlar bäygesen oyıştıruın xäbär itte. Anıñ näticäle sentäber ayında bilgele bulaçaq. Ä Tatarstan ekologiä ministrlığı häm Rusiä jurnalistları assambleyası oyıştırğan ber niçä jurnalistlar bäygelärendä ciñüçelär inde bilgelände. «Rusiä ekologiäse 2002», «Keşe häm tabiğät», «Ekologiä häm sänäğät» dip isemlängän bäygelärdä ciñüçelärne, 2nçe avgust könne «Piramida» küñel açü üzägendä qotladılar. Anda Apas rayon gäzite, Älmät neft çığaruçılarınıñ matbağası wäkilläre, Tatarstan tele-radio jurnalistları belän bergä, tabiğätne saqlawğa kertkän öleşe öçen ekologiä ministrı häm ere sänäğät şirkätläre citäkçeläre dä büläklände.

Bikä Timerova.
XS
SM
MD
LG