Accessibility links

чәршәмбе, 7 декабрь 2016, Казан вакыты 00:51

Ölkän Alievneñ sälämätlege naçarayuwı sürätendä anıñ ulı İlhan Azärbaycannıñ premyer-ministrı itep saylandı


Azärbaycanda yaña premyer-ministr, xörmätle tıñlawçılar. İlneñ parlamentı düşämbedä bu urınğa bertawıştan diärlek 41 yäşlek İlham Alievne bilgeläde. Anıñ xökümät başlığı wazifaların üti başlawı öçen xäzer inde yaña premyernıñ ätise, prezident Xäydär Alievnıñ ğına raslaw färmanı kiräk.

Başqortstanda Ural Räximov, Tatarstanda Ayrat wä Radik Şäymievlär turında ätiläreneñ mömkin warisları bularaq älegä söylänsä genä, Azärbaycanda inde monı tormışqa aşıru da başlandı - ilneñ parlamentı düşämbedä İlham Alievne Azärbaycannıñ yaña premyer-ministrı itep bilgeläde. Bakuda monı, 41 yäşlek İlhamnıñ ilneñ yaña prezidentı bulu yünäleşendä atlağan çirattağı adımı dip bäyälilär. Xäzerge däwlät başlığı, premyernıñ ätise 80 yäşlek Xäydär Aliev bügenge köndä Törkiädä däwalanıp yata, soñğı aylarda anıñ sälämätlege bik naçaraydı, 90-nçı yıllar azağında prezident inde ber yöräk operatsiese kiçergän ide. Azärbaycan konstitutsiäsendä qaralğança, ägär dä ul üz wazifaların ütäw xälendä bulmasa, yäisä ülep kitsä, däwlät başlığı urını ilneñ premyer-ministrına küçä. Awgustnıñ 4-ennän alıp bu eşne anıñ ulı İlham Aliev başqara. Zamanında Mäskäwdäge Xalıqara mönäsäbätlär institutın tämamlağan İlham säyäsätkä äkrenläp kenä kerep kitkän keşe. 90-nçı yıllar başında, küpmeder waqıt üze belem alğan institutta uqıtqannan soñ ul Mäskäwdä häm İstanbulda säwdä belän şöğellänep ala. 1994-nçe yılda ul Azärbaycannıñ däwlät qulındağı neft şirkätenä prezident urınbasarı itep bilgelänä, parlamentqa deputat itep saylana, soñraq äle anı Azärbaycannıñ Olympia komitetı räise itep tä saylap quyalar. Urısça, inglizçe häm fransuzça irken söyläşkän İlham Alievneñ säyäsi eşçänlege, ätise Xäydär Alievneñ sälämätlege naçarayğan sayın aktivlaşa bardı. Ul xakimiattäge "Yeni Azärbaycan" partiäseneñ räis urınbasarı itep bilgelände, ätise yuqta anıñ urınına törle xalıqara oçraşularnı alıp bara başladı. Moñardan tış, üzen cämäğätçelekkä kiñräk tanıtu maqsatında yäş Aliev il buylap, Olympia komitetı räise bularaq yaña sport qorılmaları açıp yörde. Läkin küp kenä küzätüçelär, İlham Aliev ätisenä xas säyäsi ostalıqqa, xarizmağa iä tügel, anıñ bügenge populärlege dä prezident ulı buluğa ğına bäyle, ägär dä ölkän Aliev xakimiattän kitsä, İlham da yuğalaçaq dip isäpli. Säyäsi küzätüçe Elmar Guseynov, "aña xakimiatkä kilüwe bik ciñel, ä menä xakimiattä qalu bik awır bulaçaq" dip belderä. Anı xökümät citäkçese itep saylawnı da İlham üze tügel, ä ätise Xäydär Aliev başlap cibärgän dip farazlana. Yaña premyernı tiskäre bäyäläw bigräk tä oppozitsiägä xas, älbättä. Anıñ parlamenttağı deputatları düşämbe kön bulğan tawış birüdä qatnaşudan baş tarttı. "Musavat" partiäse başlığı İsa Gambar keçe Alievne premyer itep saylaw uñayınnan, "bu Azärbaycanda yaña törle patşalıq buldıru omtılışı bulıp tora häm bez Xäydär Aliev rejimınıñ bu tırışlığı uñmayaçağına ışanabız" dip belderde.

Audio, İsa Gambar

Läkin Azärbaycandağı oppozitsiäneñ Alievlär ğailäsenä qarşı torırlıq köçe yuq. Yaña premyer häm ixtimal yaña prezident öçen töp qurqınıç, Azärbaycannıñ xäzer xakimiattä utırğan elitası eçendäge törle törkemnärdän kilä. Alar belän İlham Aliev niçek urtaq tel tabar, monısı älegä bilgesez. Şuşı yılnıñ üktäbrendä ildä prezident saylawları uzarğa tieş, däğwaçılar arasında ölkän Alievne dä, keçesen, İlhamnı da kürep bula. Uramnarğa elengän saylawaldı elmäsürätlärdä ätile-ullı Alievlar bergä töşerelgän. Prezidentnıñ sälämätlege niçek digän sorawğa İlham Aliev düşämbe könne parlamentta, ul tizdän ilgä qaytır digän ömet belderde. Qayber küzätüçelär, ildä xökümät başlığın almaştıru prezident Alievneñ xäle kinät kenä naçarayuwı belän añlatıla ala dip isäpli.

Kärim Kamal, Praga
XS
SM
MD
LG