Accessibility links

сишәмбе, 6 декабрь 2016, Казан вакыты 13:24

Mozdok xästäxanäsendä bulğan şartlawdan soñ Putin xoquq saqlawçılarnı tarqawlıqta ğäyepläde


Tönyaq Osetiä respublikasında bügen matäm köne. Soñğı mäglümätlärgä qarağanda, comğa könne Mozdok xärbi xästäxanäsendä bulğan intihar xöcüm näticäsendä kimendä 50 keşe xäläk bulğan, 80-e yaralanğan. Şuşı çirattağı terror ğämäle Mäskäwneñ Çeçnyada tärtip urnaştıru plannarın qurqınıç astına quydı. Rusiä prezidentı Putin xoquq saqlaw oyışmaların tarqawılıqta ğäyepläde häm moña çik quyarğa çaqırdı...

Belgeçlär äytüençä Mozdoknıñ xärbi xästäxanäsenä bärep kergän Kamaz maşinasında berniçä tonna şartlatqıç bulğan. Şartlaw şul tikle köçle bulğan ki, 3 qatlı xästäxanä binasınnan berni qalmağan diärlek. Räsmi sannar: 50 keşe xäläk bulğan, 80 çaması yaralanğan. Ämmä başqa mäglümätlärgä qarağanda, bu sannar kimetelgän bulırğa mömkin. İsemnäre äytelmägän militsiä häm FSB xezmätkärläre Kommersant gäzitenä äytüençä, şartlaw waqıtında xästäxanädä kimendä 150 däwalanuçı häm 30lap tabip bulğan. Monnan tış, urın citmäw säbäple, işek aldına berniçä tirmä quyılğan bulğan, alarnıñ xärbersendä 8-dän alıp 16ğa qädär keşe. Şulay itep, xastaxanä cirlegendä barlığı 200-läp keşe bulğan, alarnıñ härbese, yä yaralanğan, yä ülgän. Bez Mäskäwgä ber sannar cibäräbez, xäbärlärdä başqasın işetäbez, digän alar Kommersant gäzitenä.

Rusiäneñ tikşerü buınnarı şuşı waqiğanı tikşerü eşenä kereşte. Alar quyğan töp sorawlarnıñ berse şul: niçek itep şartlatqıç töyägän yök maşinası, şul qädäre tikşerü noqtaların ütep Rusiä xärbiläre qaramağında bulğan xästäxanägä kilep citä alğan? Rusiä prezidentı Vladimir Putin monı, çamadan-tış başbaştaqlıq dip atadı:

Audio

Düşämbedä Malayziägä säfär çığır aldınnan Putin, general'' prokuror Ustinov häm Yuğarı Mäxkämä räise Lebedevnı Kremlgä çaqırtıp terrorçılıqqa qarşı çaralar kürergä öndäde. Läkin bu çaralar qanun qısalarında alıp barılırğa tieş, dip östäde ul. Saqlanu ministrı Sergei İvanov ta, FSB başlığı Nikolay Patruşev ta, Mozdokta tieşle saqılq çaralı kürelmägän bulğanın tanıdılar. Patruşev süzlärençä, bulaçaq xöcüm turında tögäl mäglümät bulmasa da, nindider mäglümätlär bulğan, alar tieşle keşelärgä citkerelgän, läkin bu räsmilär kiräkle çaralar kürmägän:

Audio

Mozdok garnizonı başlığı Sergei Xmelevski häm xärbi gospital başlığı Artur Arakelyan urınnarınnan alınğan. Düşämbedä, Mozdokta şartlağan Kamaznıñ elekke xucasınıñ qulğa alınuwı turında xäbär itelde. İnguşetiädä yäşägän bu keşe zamanında maşinasın çeçen qaçaqlarına satqan bulğan. Tikşerü eşläre däwam itä, läkin küplär monı bertawıştan, çeçen suğışçılarınıñ üç alu ğämäle dip atıy häm bu uñaydan Şamil Basaev isemen telgä ala. Soñğı könnärdä Çeçnyanıñ törle urınnarında bulğan bäreleşlär waqıtında alar distälägän keşesen yuğaltqan. Düşämbedä Aslan Masxadovnıñ Rusiädäge wäkile Salambek Maigov, Masxadovnıñ da, İçkeriä citäkçelegeneñ dä bu şartlawğa ber qatışı da yuq digän belderü yasadı. Basaev turındağı sorawğa ul, Şamil İçkeriä citäkçelegenä kermi dip äytte.

Bilgele bulğança, Mäskäw Masxadov belän dä başqalar belän söyläşer başlarğa telämi. Soñğı şartlaw isä Kremlneñ Çeçnyada tınıçlıq urnaştıru tırışlığın qurqınıç astına quya. Üktäber ayında ütäçäk prezident saylawları bu yünäleştä möxim adım bulır dip qarala ide. Yäkşämbedä, Çeçnya administartsiäse başlığı Äxmät Qadırov bu saylawlarda qatnaşaçağın bedlerde. Başlağan eşne tämamlaw minem Allağı täğälä aldında wazifam, dip añlattı ul qararın. Qadırovtan tış, namzätlär arasında tağın 8 keşe bar. Tik menä respublikada ber tuqtawsız şartlawlar yañğırap torğanda ul saylawlarnıñ näticäse nindi bulır?..

Ali Gilmi, Praga
XS
SM
MD
LG