Accessibility links

дүшәмбе, 5 декабрь 2016, Казан вакыты 21:50

Räsmi xäbärlärgä küzätü...


Esse könnärgä qaramastan, räsmi tormış ta tuqtap tormıy. Düşämbe, 4 avgust könne, Qazan kremlendä Tatarstan prezidentı Mintimer Şäymiev Xalıqara aviatsiä sänäğäte berlege prezidentı Tatyana Anodina belän oçraştı. Oçraşuda süz respublika oçqıç tözüçeläreneñ yaña proyektı turında bardı. Şulay uq anda Tatyana Anodina Mintimer Şäymievkä xalıqara premiä – Aviatsiä sänäğäten üsterügä häm yaña aviatsiä texnikasın buldıruğa ayıruça zur öleş kertkäne öçen altın medal häm Maqtaw diplomı tapşırdı. Tatarstan prezidentına bu büläk grajdanlıq aviatsiäseneñ yubileyları uñayınnan tapşırıldı, dip äytelsä dä, Şäymievnıñ respublika köçläre belän genä diärlek aviatözeleş tarmağın alıp baruda kertkän öleşe dä iskä alınğandır, möğäen. Şunısın da äytergä kiräk, federal’ üzäktän bu tarmaqqa yärdäm bik az buluğa da qaramastan, Tatarstan aviatözüçeläre yaña tör texnika citeşterä, Rusiädä genä tügel, xätta xalıqara bazarda da totrıqlı urın yawlıy.

4 avgust könne respublikanıñ Çallı şähäre xakimiäte başlığı Räşit Xämädievne soñğı yulğa ozattılar. Şähärneñ KamAZ mädäniät yortında märxüm belän xuşlaşu uzdı. Anda prezidentı Mintimer Şäymiev, premyer-ministrı Röstäm Miñnexanov häm başqa respublika citäkçeläre qatnaştı. Şunısın da äytergä kiräk, Räşit Xämädievne soñğı yulğa ozatırğa meñnärçä keşe cıyıldı. Mintimer Şäymiev üzeneñ xuşlaşu süzendä, Xämädievne Çallıda yäşäwçelär genä tügel, böten respublika ozata, bu bezneñ öçen bik zur yuğaltu dip assızıqladı. Xäzerge waqıtta Çallı xakimiät başlığı wazifaların başqaruçı bulıp Räşit Xämädievneñ berençe urınbasarı bulıp eşlägän Gennadiy Yemel’yanov bilgelände.

Sişämbe könne Tatarstanıñ Ministrlar Kabinetındağı çirattağı brifingta süz Svyazinvestneftexim açıq aksionerlıq cämğiäte tözelü turında bardı. Soñğı waqıtta matbuğatta Başqortstanda neft’ çığaru tarmağı şäxsi qullarğa küçü teması iğtibar üzägendä. Tatarstanda da Svyazinvestneftexim cämğiäte aşa däwlät milke xosusıylaştırılğan digän imeş-mimeşlär işetelä. Läkin cämğiätneñ general direktorı Valeriy Sorokin süzlärenä qarağanda, Rusiäneñ general prokuraturası uzdırğan tikşerülär bu farazlarnıñ döreslekkä turı kilmäwen açıqlağan. Şulay itep, xäzergä Svyazinvestneftexim üzeneñ formalaşuın däwam itä.

XS
SM
MD
LG