Accessibility links

Кайнар хәбәр

Marat Moratov:«Çittäge tatar mäğlümat çaraları Tatarstannıñ finans yärdämenä ömet itä ala.»




«Tatmedia» agentlığınıñ xoquqı häm iqtisadıy nigezen tözü eşe tämamladı, dip belderde 5nçe avgustta yaña agentlıqnıñ başlığı Marat Moratov. Bu könnärdä matbuğatta oyışmanıñ nigezlämäläre basılıp çığarğa tieş. Dimäk yaqın arada «Tatmedia» agentlığı tulı qüätkä eşli dä başlıy. «Tatmedia» agentlığı räsmi matbuğatnıñ ostalığın häm sıyfatın başqa mäğlümat çaraları belän köndäşlek itä alırlıq däräcägä qädär kütärü wazifasın quya ikän.

«Nindi gäzitneñ baş möxärriren eştän alaçaqsız?» dip, jurnalistlar küpme qızıqsınsa da, Marat Moratov bu sorawğa cawap birmäde. Läkin, räsmi gäzitlärneñ xäzerge torışı belän qänäğät bulmawın sizderde.

Elek gäzitlär aqçalarnı byudjettan turıdan turı alğan bulsa, xäzer dotatsiäne bülü «Tatmedia» agentlığı qaramağında bulaçaq. Baş möxärrirlärgä här tien öçen cawap birep, alğan aqçanıñ çınnan da şul külämdä kiräk bulğanın raslarğa turı kiläçäk.

Marat Moratov süzlärençä, agentlıq qaramağında 8 räsmi gäzit, 11 jurnal häm «Yaña ğasır» televidenieseneñ däwlät öleşe (48,49% aksiä) bulaçaq. «Tatmedia»ğa, şulay uq, rayon matbuğatı häm ike räsmi mäğlümat agentlığı, barlığı 100-gä yaqın räsmi oyışma buysınaçaq. Däwlät matbuğatın finanslaw öçen agentlıqqa bu yılğa bülep birelgän byudjet aqçası 230 million sum tiräsendä, dip isäplänä. Şäxsi häm kommersiä kanalları, gäzitlär, respublikanıñ sotsial zakazın ütägän oçraqta, yäğni sotsial mäs’älälärne, yäşlärne tärbiäläw häm milli mädäniät temalasın yaqtırtqan oçraqta, respublika xakimiätlärennän finans yärdämgä ömet itä ala. Anıñ öçen här telägän mäğlümat çarası grant öçen bäygedä qatnaşırğa tieş bula. «Azatlıq» radiosı xäbärçese birgän sorawğa «Tatmedia» ağentlığınıñ başlığı Marat Moratov, Tatarstannan çittä çığuçı tatar matbuğatı da Tatarstan birä torğan grantlar öçen yarışa ala, dip belderde. Çittäge tatar mäğlümat çaraları öçen maxsus grantlar bulaçaq, dide ul.

Gäzit-jurnallarnı ber tübä astında ciyü xaqında xäbär çıqqaç, saylawlar yılında Tatarstan xakimiätläre matbuğatnı üz qulında totarğa teli, dip yazuçılar buldı. Gäzit möxärrirläre arasında «Tatmedia» agentlığına qarata törle fikerdä toruçılar bar. «Azatlıq» radiosı xäbärçese belän bulğan söyläşüdä, dotatsiägä genä ömet itüçe häm az tirajlı ber gäzitlärneñ citäkçese agentlıqnıñ oyışuına qarata quanıç beldersä, ayaqta nıqlı basıp toruçı, xälle ber gäzitneñ citäkçese bu räsmi oyışma irekne çikläwgä kitermäs mikän, digän şiklänülären sizderde. Şäxsi qullarda bulğan gäzitlär isä, ber fikerlek, senzura zamanı kilä, dip yazıp respublika xakimiätläreneñ bu qararın şunduq tänqitläp çıqtı. Şulay itep, «Tatmedia» agentlığınıñ häm mäğlümat çaralarınıñ kiläçäktä mönäsäbätläre niçek bulır, älegä äytep bulmıy.

Bikä Timerova.
XS
SM
MD
LG