Accessibility links

Кайнар хәбәр

Elegräk Ğiraq suğışın yaqlağan demokratlar xäzer prezident Bushnı tänqitläw yulın saylıy


Mäğlüm ki, prezident Bushnıñ Ğiraqqa qarşı suğış başlawın Amerika Quşma Ştatlarındağı qayber demokratlar da yaqlap çıqqan ide. Läkin xäzer, saylawlar yaqınlaşu belän alar respublikan partiäsennän saylanğan prezidenttan çitläşerergä tırışa. Senator Joseph Lieberman şundıylarnıñ berse, kiläse yılda ul Bush belän Aq yort öçen köräşergä cıyına.

Demokrat senator Joseph Lieberman çınnan da prezident Bushnıñ suğış plannarın yaqlawda xätta qayber respublikannarnı da uzdırğan ide, xörmätle tıñlawçılar. Xäzer isä ul, kiläse yılğı prezident saylawlarında Bushnıñ töp köndäşe bulırğa cıyına häm şuña kürä, anı Saddamğa qarşı qırıs çaralar kürü mäs''äläsendä elek qaynar yaqlasa da, üzen äkren genä Aq yortnıñ tışqı säyäsätennän çitläşterä. Äle 2000-nçe yılda uq Joseph Lieberman saylawlarğa demokratlarnıñ vitse-prezident nämzäte bularaq çıqqan ide, şuña da ul amerikannarğa yaxşı tanış, läkin 2004-tä üzen inde prezidentlıqqa täqdim itü öçen aña äle yaqlaw citep betmi. Häm xäzer ul äkrenläp George Bushnıñ tışqı säyäsäten tänqitläw yulına borıla. Düşämbe könne ul Waşingtonda ilneñ matbuğat klubında çığış yasap, üzeneñ elek Ğiraq suğışın xuplawın yaqlasa da, Quşma Ştatlar xökümäteneñ Ğiraqta Saddamnı bärep töşergännän soñ ni eşlärgä kiräklegen bilgeli almawın kisken tänqitläp çıqtı.

Audio, Joseph Lieberman

"Min suğışnı yaqladım, min monı eşläw döres dip uylağan idem. Minemçä, xäzer dönya da iminräk, Amerika da iminräk, süzdä yuq, töbäk tä iminräk häm Ğiraq xalqı da Saddam kitü belän üzen imin xis itä. Läkin min Bush xakimiateneñ Saddamnan soñğı Ğiraq belän eş itügä äzer bulmawına şaqqatam" dip belderä senator Lieberman. Ul prezident Bushnıñ iñ ışanıçlı, iñ köçle qazanışı sanalğan däwlät iminlege ölkäsendäge säyäsäten tänqitli, anıñ fikerençä, respublikan prezident küp süz söyläsä dä, 11-nçe sintäbr waqiğälärenä barıber tieşle cawap qaytara almadı.

Audio, Joseph Lieberman

"Bu prezident, George Bush, üzeneñ ğämälläre häm ğämällär kürä almawı belän, süzläre häm çınbarlıqta alıp barğan säyäsäte arasındağı ayırması belän, bezneñ alda torğan yanawlarğa bitaraflığı belän Amerikanı iminräk häm yaxşıraq kiläçäkkä alıp barırlıq keşe tügellegen rasladı" di aña köndäş bulırğa äzerlängän demokrat senator Joseph Lieberman. Ul Aq yortnıñ Ğiraq suğışı çorınnan soñ Yevropadağı berektäşläre belän aralarnı haman da yaxşırta almawın da zur xata dip sanıy, bigräk suğışnıñ xäzer andağı ğısyançılarğa qarşı alıp barıluwın iskä alğanda.

Audio, Joseph Lieberman

"Min äle suğış aldınnan uq kileşep, bigräk tä NATOdağı berektäşlärebezgä, "yarıy, sez bezne suğışta yaqlamadığız, läkin bez Saddamnan soñ Ğiraqnı torğızu häm imin itü öçen sezneñ yardämgä moxtac, mömkin bulsa bezgä quşılsağız ide" dip äyter idem. Bu äle haman da eşlänmäde häm bez xäzer monıñ öçen zur bäyä tülibez" di senator Lieberman. Ägär dä min prezident bulsam, xäzer Ğiraqta berniçä ildän, şul isäptän NATO illärennän dä ğäskärilär urnaşqan bulır ide dip belderä ul.

Kärim Kamal, Praga
XS
SM
MD
LG