Accessibility links

чәршәмбе, 7 декабрь 2016, Казан вакыты 21:26

30 awgust bäyrämen ütkärü tärtibe bilgelände. Respublika köne onıtılmasmı?




6nçe awgustta Qazan şähär başlığı urınbasarı Älfiä Tutayeva jurnalistlar aldında çığış yasap, Tatarstan respublikasınıñ oyışu köne häm Qazan şähäreneñ tuğan könenä bilgelängän çaralar xaqında xisap tottı.

Bäyräm çaraları isemlegendä kürsätelgän kürgäzmä, konsert, sport yarışları kübesençä Qazan şähärneñ tuğan könenä bağışlanğan. Mäsälän, şığır bäyräme, Qazan tarixın gäwdäländergän tamaşalar, yäşlär öçen küñel açu programması, «olı şähärneñ yäşlege» dip isemlängän balalar bäyräme, «Zur Prolomnaya uramı buylap yörü» digän isem belän Bauman uramında tamaşa qılu çarası. Alay ğına da tügel, Bauman uramında, Los Angeles şähärendäge sıman, yoldızlar alleyası buldırılaçaq ikän. Qazannıñ iñ populyar uramına quyılaçaq berençe 2 yoldıznıñ iseme bilgele inde – ul İlham Şakirov belän Älfiä Afzalova.

Qazan başlığı urınbasarı Älfiä Tutayeva, Qazannıñ elekke isemnären yaratıbraq birä axrısı. Mäsälän ul, İrek mäydanın elekkege Teatr mäydanı digän iseme belän telgä aldı. Anda, açıq hawada bulaçaq konsertta, şähär orkestrları iñ yaxşı säxnä äsärlären başqaraçaq ikän.

30nçe awgust bäyrämeneñ maqsatlarınıñ berse – Tatarstanda törle millätlärneñ dustanä yäşäwen kürsätü, dip iğlan itelde. Şulay itep, Qazanda yäşäwçe törle millät wäkilläre milli aşlarnı äzerläp, üz cırların cırlayaçaq. Bu çara «Qazan» milli mädäni üzäge aldında ütkäreler.

30nçe awgust bäyrämendä sport yarışları, töp urınnarınıñ bersen alıp toraçaq. Yıl sayın bula torğan at çabışları häm avtouzışlarğa östämä räweştä, 5 meñ bala qatnaşlığında ütä torğan Rusiä sportokiadasınıñ açılu tantanası da 30nçe awgustta uzaçaq.

Şunıñ belän bergä Rusiäneñ estrada yoldızları, säyäsätçelär, cämäğät eşlekleläre Qazanğa kilep futbol uyının uzdırırğa ciena. Mäsälän «Berdäm Rusiä» firqäse citäkçese Boris Grızlov häm tanılğan sportçı, millättäşebez Rinat Dasayev anda qatnaşırğa teläk beldergän inde. Şunıñ belän bergä Rusiä estradası yoldızları, şähär üzägendä konsert ta birergä uylıy. Futbol uyını häm konsert «Bala yörägenä qağıl» dip isemlängän xäyriä çarası qısalarında uzdırıla. Xäzer Qazanda 55 bala yöräkkä operatsiä yasaw öçen çiratın kötä ikän. Şähär xakimiäteneñ sälämätlek saqlaw idäräse citäkçese Vasil Ziatdinov äytüençä, şuşı awıru balalarğa xirurgiä yärdäme bulsa, alar sälämät balalar kebek uq, normal tormış alıp bara alır ide. Ber operatsiä 100 meñ sumnan artığraq bäyägä töşä. Xäyriä çarasında şähär xakimiätläre 10-12 million sum cıyarğa isäplär tora.

Konsert qarap, şığır tıñlap, Qazansu östendäge salütka xozurlanıp, öylärenä arıp qaytqan keşelär respublika köne turında iskä töşererlär mikän.? Äle 2001 yılda ğına, suverenitetınıñ 11 yıllığı, dip bilgeläp ütelgän 30nçe awgust bäyrämeneñ eçtälege başqa xäzer . Anıñ iseme dä yıl sayın diärlek üzgärtelä. «Respublika möstäqillege köne» , «deklaratsiä iğlan itelgän kön» digän isemnärdän başlap, ul «Respublika köne» digän süzgä qädär ğadiläşterelde. İnde bıyılğısı «Tatarstan Respublikasınıñ oyışqan köne» digän baş astında ütäçäk.

Bäyräm çaraları isemlegendä tatarlarğa atap oyıştırtılğan dip, Tuqay häykäle yanındağı şığır bäyrämen häm Kamal teatrı qarşındağı tamaşanı atap bula. Cırğa, moñğa bay tatar xalqı xozurına «Tuğan yağım Tatarstan» digän bäyräm konsertı täqdim iteläçäk.

Bäyrämne uzdıru öçen kiräkle açqanı xakimiätlär, respublika, şähär byudjetınnan, öleşçä Federal Üzäktän alırğa isäpli. İñ zur ömetne alar sänäğät şirkätlärenä, alarnıñ ximayä aqçalarına bağlıy. Bäyrämgä küpme açqa totılaçağı äle bilgele tügel, şuña bäyräm çaraları isemlege dä üzgärergä mömkin.

Bikä Timerova.

XS
SM
MD
LG