Accessibility links

шимбә, 3 декабрь 2016, Казан вакыты 16:48

Yevropa Berlegeneñ kiñäyüwe yözlägän meñ keşeneñ könbatışqa küçüwenä kiteräçäk


Germaniädäge "Deutsche Bank" maxsus ber tikşerenü ütkärep, Könçığış Yevropa illäre Yevropa Berlegenä quşılğannan soñ anda yäşäwçe meñlägän keşeneñ mul tormış wä uñayraq eş şartları ezläp qitğanıñ könbatışına küçüwen farazlıy. Bu san yılına 200 meñgä citä ala häm küçü ğälämäte kimendä 10 yıl däwam itäçäk dielä şul tikşerenüdä.

"Deutsche Bank" ütkärgän tikşerenü näticälärenä qarağanda, kiläse yılda Yevropa Berlegen tağın 10 äğza ilgä kiñäytü qitğadağı iqtisadi wäzğiattä genä tügel, anda yäşägän xalıqlarnıñ tormışında da zur üzgäreşlärgä kiteräçäk. Bank, Yevropanıñ könçığışınnan könbatışına küçenü başlanaçaq, häm bu 2050-nçe yılğa tiklem däwam itäçäk digän faraz belderä. "Deutsche Bank"nıñ tikşerenü bülege bu könnärdä şul maxsus xisabın bäyän itte, annan şul kürenä, Yevropa Berlegeneñ xäzerge äğzalarına, berençe çiratta Germaniä häm Avstriägä yaña quşılğan illärdän yılına 200 meñläp keşe küçep kiläçäk, bu şul külämdä 10-12 yıl saqlanaçaq, läkin äle annarı da yartı ğasır eçendä Könçığış Yevropadan yılına 75 meñläp keşeneñ kilep urnaşuwı kötelä. Tikşerenüne ütkärgän belgeçlärneñ berse Tobias Just..

Audio, Tobias Just

"Bez hiç kenä dä Könbatış Yevropağa yä industrial'' illärgä küçep kilüçelär taşqını urğılır dip uylamıybız, läkin möxäcirlär sanınıñ artuwın häm monıñ yuğarı bulıp qaluwın farazlıybız" di "Deutsche Bank"ta eşläwçe Tobias Just. İmmigratsiä mäs''äläse kiñäygän Yevropa Berlege öçen iñ awır problemalarnıñ berse bulıp tora, xäzerge äğza illärneñ xalqı arasında, Berlekneñ kiñäyüwe möxäcirlär sanın arttırıp, eş xaqlarınıñ töşüwenä häm eşsezlekne üsterügä kiteräçäk digän qurqular bar. Alar şundıy köçle ki, Yevropa Berlegendäge qayber illärneñ xökümätläre, qabul iteläçäk yaña illärdän eşçelär kilügä qarşı törle çikläwlär dä kertergä buldı. Alar berençe çiratta, älbättä, tübän belemle eşçelärgä, tözeleş häm awıl xucalığında eşläwçelärgä qarıy, studentlar häm yuğarı belemle, osta belgeçlärgä qarata andıy çikläwlär yuq. Läkin bu ölkädäge kirtälär barıber 6-7 yıldan soñ yuqqa çığaçaq häm ber ildän ikençesenä küçep kitü bar Yevropa buylap irekle bulaçaq. Keşelärneñ şulay eşläwe turında Tobias Just bolay di.

Audio, Tobias Just

"Töp säbäp üz xällären iqtisadi yaqtan yaxşırtırğa teläw, alar Könbatıştağı yuğarıraq eş xaqların qazanırğa teli" di "Deutsche Bank" belgeçe. Bu uñaydan ul elekke täcribäne dä telgä ala, tikşerenü barışında İspaniä häm Portugaliäneñ Yevropa Berlegenä quşıluwınnan soñ monıñ möxäciriatkä ni däräcädä tä''sir itüwe dä iskä alınğan. "Deutsche Bank" farazları elek ütkärelgän tikşerenülärneñ näticäläre belän ber çama, yäğni ul alarnı üzençä raslıy bulıp çığa. Xalıqara migratsiä oyışması bıltır, 2020-nçe yılğa qädär Könbatış Yevropağa 3 millionnan alıp 5 millionğa qädär keşe küçep kiläçäk digän faraz çığarğan ide. Monıñ uñay yaqları bulğan kebek, tiskäreläre dä citärlek. Yevropa Berlegeneñ xäzerge äğzaları öçen yaña belgeçlär, östämä eş qulları kilü yaxşı närsä, älbättä, läkin Könçığış Yevropa illäre öçen bu andağı iñ şäp belgeçlärneñ kitüwen añlataçaq. Tobias Just süzlärenä qarağanda, mondıy qurqınıç berençe çiratta Pol''şağa, ä soñraq isä Rumıniä häm Bolğarstanğa yanıy.

Kärim Kamal, Praga
XS
SM
MD
LG