Accessibility links

шимбә, 10 декабрь 2016, Казан вакыты 05:59

Xoquqçı Fäyzi Motaharov: “Ağidel tözüçeläre Aqtanıştan aqça kötä...”


“Вечерняя Казань” gazetası çärşämbe könne şundıy xäbär bastırdı. Prezidentnıñ tuğan yağı üzäk belän elemtäsez qalğan. Elemtä mäs’äläsendä gazeta arttırğan, älbättä. Aqtanış rayonı belän Qazan arasında telefon elemtäse bik yaxşı. İñ berençelärdän bulıp, käräzle telefon da Aqtanış rayonına kertelde. İnternetqa tatar mäktäplären yalğaw buyınça Aqtanış artta österälmi. Şulay da, gazetanıñ xäbärendä xaqlıq bar. Çınnan da, aqtanışlılar berniçä kön ORT häm RTR kanalın qaramağan. Säbäbe dä, gäzittä yazılğança, tele-radiotapşırular üzägeneñ, yäğni РТПЦ dip atalğan oyışmanıñ “Tatenergo”ğa aqça tülämäwendä ikän. Ä bit şuşı “Tatenergo”nıñ general' direktorı bulıp Aqtanış rayonınıñ Nurbayan kolxozında, prezident Şäymiev tuğan cirdä üskän häm moña qädär Älmät, Aqtanış rayonnarınıñ xakime bulğan İlşat Färdiev eşli. Niçek inde İlşat äfände Färdiev yäş häm ziräk citäkçe kürälätä üzeneñ genä tügel, prezident Şäymievneñ yaqtaşların televidenie tapşırularınnan mäxrüm itkän? Aqtanışlılarnı çınnan da ekrannan ayıruda, “Tatenergo”nıñ ğayıbe barmı, digän soraw belän min şuşı oyışmanıñ finanslar bülegenä möräcäğät ittem. “Ğayıp tügel, säbäp kenä”, dip cawap birdelär miña. Birelgän elektr energiäse şaqtıy kiräkle häm qimmätle tovar, ä eş öçen tülämäsäñ, bu tovar çığarunı tuqtatırğa kiräk bit. Çınnan da, elektr. energiäse öçen tülämäwçelär yış qına tok aludan mäxrüm itelälär. “Tatenergo”nıñ citäkçese İlşat Färdiev üzeneñ tuğan rayonın bik yaratsa da, Aqtanışqa taşlama yasalmıy. “Tatarstan yaña ğasır” telekompaniäseneñ dä millionnarça burıçı bar, РТПЦ oyışmasınıñ da. Ä şundıy rayonğa, şundıy keşelärgä xörmät belän qaraw, nindider taşlama yasaw urınlı bulmas ideme ikän? Energetiklarnıñ cawabı qısqa buldı. Ä energiä belän tä'min itüçelärgä ixtiram bulmasa, tormış bötenläy tuqtala bit. Şulay itep, başta burıçıñnı tüliseñ, annan lampoçka qabızasıñ. “Tatenergo” citäkçese İlşat Färdievneñ bertuğan enese Zäy rayonın citäkli. Ämma Rinat äfände Färdiev qaramağındağı predpriätielär elektr öçen tülämäsä, alarnı da rubil'nik belän däwalıylar ikän. Burıçlarnı tüläp betergäç, “Tatenergo”nıñ buxgalteriäsenä barasıñ, käğäzläreñne kürsätäseñ häm çıbıqlar yañadan elektr taşıy başlıy. Menä şundıy ul, 21 ğasır başındağı Rusiä häm Tatarstan iqtisatı qağidäläre. Qoda yuq, tuğan yuq – eş berençe urında.

Äytkän süzne ütämäwçelär, waqıtında aqça tülämäwçelär meñnärçä eşçelärne, alarnıñ ğailälärne awır xälgä quya. Pänceşämbe könne bez Qazanda Başqortostan tatarların kürdek. Alar yärdäm sorıy. Şul uq Aqtanış rayonı xakimiäte uzğan yılda uqıtuçılar konferensiäsen ütkärer aldınnan Başqortostannıñ Ağidel şähäre tözüçeläre belän kileşü tözegän. Häm Ağidel tözüçeläre Aqtanıştağı 80-nçe hönäri uçilişçesın menä digän itep remontlağannar. Konferensiägä kilgän prezident, premyer-ministr da alarnı maqtağan. Ämma ber yıl ütsä dä, tözüçelär häm alarnıñ ğailäläre eşlängän eşe öçen 600 meñ sum aqçanı haman da kötälär ikän. Ağidel şähärendä yäşäwçe xoquq belgeçe Fäyzi äfände üzebezneñ qärdäşlär belän arbitraj mäxkämäse aşa tügel, ä tuğannarça söyläşergä dip Qazanğa kilgän.

Başqortostan tatarlarına yärdäm itär öçen bu yulı milli problemalarnı çişü kiräk tügel. Barı tik eşlängän eş öçen tieşle aqçasın tülärgä. Ul aqça alınmasa, 1 sentäbergä qädär Ağideldä yäşäwçe tatar balalarına däresleklär dä, mäktäp kieme dä satıp alıp bulmıy. Şunısı qızıq, atom stansiäsen tözüçelär yäşägän Ağidel şähärendä tatarlar küpçelekne täşkil itä, 80-90% qädär. Tatar dönyasınıñ ğäziz töbäge Aqtanış kürşedäge Ağidel tatarların töp başına utırtmas, dip uylarğa kiräk. Kürşe respublikadan kilep, menä digän PTU tözekländergän tatarlar elektr energiäsen cibärep tä aqçasın ala almağan “Tatenergo” berläşmäse kebek ük xäldä.

Rimzil Wäli. Qazan.

XS
SM
MD
LG