Accessibility links

якшәмбе, 11 декабрь 2016, Казан вакыты 14:47

Bıltırğı Bali şartlawların oyıştıruda ğäyeplängän berençe keşegä ülem cäzası çığarıldı


Könneñ töp xäbärlärennän berse, İndoneziädäge mäxkämäneñ bıltır Bali utrawında şartlaw oyıştırğan islamçını ülem cäzasına xökem itüwe buldı, xörmätle tıñlawçılar. Uzğan üktäbrdä çit il keşeläre yörgän tönge klub qarşındağı şul şartlaw näticäsendä 202 keşe hälak bulğan ide. Mäxkämä qararın iğlan itü aldınnan ğına, ike kön elek İndoneziä başqalası Cakartanı yänä ber şartlaw teträtte.

Balidağı şartlawlarnı oyıştıruda ğäyeplängän Amrozi bin Nurqasiymğa xökem qararı atnakiç irtän, Bali utrawınıñ töp şähäre Denpasarda iğlan itelde. Xäkim İ Made Karna:

Audio, Karna

"Xäkimnär şuşı mäxkämägä tartılğan Amrozine terror cinayätlären qıluda ğäyeple dip tabıp anı ülem cäzasına xökem itä" dip belderä Balidağı xäkim. 40 yäşlek Amrozi şartlawlarnı oyıştıruda şiklänelgän 30-lap keşeneñ berse genä, ul üzeneñ şartlatqıç quyu öçen maxsus maşina häm şartlatqıç satıp aluwın tanıdı. Läkin cawapqa anı berençe itep tartu, häm äle citmäsä anıñ mäxkämä utırışları barışında üzen bik höcümçän totuwı Amrozine mäğlümat çaralarınıñ iğtibar üzägenä quydı. Çığışı belän ul küpçelegen möselmannar täşkil itkän kürşe Yava utrawınnan, üzeneñ islam dinenä birelgänlegen ul mäxkämä utırışlarında kürsätep tordı, xökem iğlan iteläse könne binağa kergändä dä Amrozi täqbir äytep, yähüdlärgä qarşı şiğarlär qıçqırıp tordı. Ä elegräk uzğan tıñlawlarda ul, Bali höcümnärendä "aqlar" ülärgä tieş ide dip belderde. Hälak bulğan 202 keşeneñ zur küpçelegen Avstraliä häm Yevropadan kilgän turistlar täşkil itkän ide. New Yorktağı 11-nçe sintäbr höcümnärennän soñ bu iñ zur terror ğämälläreneñ berse buldı. Tönge klubtan tış şartlaw utrawdağı amerikan konsullığı yanında da oyıştırldı, läkin anda ülüçelär bulmadı. Amrozi häm anıñ fikerdäşläre utrawdağı radikal'' islamçılar çeltärenä bäyle dip farazlana. Ä anıñ isä üz çiratında mäğlüm "äl-Qaidä" belän tığız bäyläneşläre bar digän xäbärlär yöri. Şul suğışçan islamçılarnıñ yulbaşçısı Äbübäker Bäşir dä bügenge köndä, Bali şartlawlarına bäyle mäxkämägä tartıldı. Amrozineñ advokatları ülem cäzasın çığarğan xökem qararın üzgärtergä tırışaçağın belderde, alar fikerençä, ul barı tik maşina häm şartlatqıçlar tabuda ğına yardäm kürsätkän, läkin şartlawnıñ üzen oyıştırmağan. Mäxkämä qararların qat-qat tikşerü İndoneziädä berniçä yılğa suzıla ala, häm ğädättä ul azaqta, ilneñ prezidentına yarlıqaw üteneçen yazu belän tämamlana. Läkin İndoneziäneñ xäzerge başlığı prezident Megawati Sukarnaputri inde berniçä märtäbä üzeneñ terrorçılarğa qarşı nıq toraçağın, ülem cäzası çığarılğannarnı yarlıqamayaçığın belderde. Bali şartlawında hälak bulğannarnıñ ğailä äğzalarında da atnakiç iğlan itelgän xökem qararı qarşılıqlı xislär uyata. Beryaqtan alar ğadellekkä ireşü häm cinayätçene tieşle däräcädä cäzalaw säbäple qänäğätlänu xise kiçersä dä, Amrozineñ älegä üze genä buluwı, ä anıñ f ikerdäşläreneñ haman da törle höcümnär oyıştıruwı alarda borçılu uyata. Sişämbe könne genä başqala Cakartada, misal öçen, amerikannarnıñ "Marriott" qunaqxanäse yanında yaña şartlaw oyıştırıldı, anda kimendä 10 keşe hälak buldı. Bu da radikal'' islamçılar eşe digän farazlar bar.

Kärim Kamal, Praga
XS
SM
MD
LG