Accessibility links

пәнҗешәмбе, 8 декабрь 2016, Казан вакыты 10:59

Ramil Sabirov: Üz milläteñä qayda da fayda kiterep bula...


Soñğı arada Rusiädä Törkiä belän bağlanışlarğa şiklänebräk qaraw sizelä başladı. Bigräk tä, anıñ mäğärif sistemasına. Qayberäwlär fikerençä, törek uqıtuçıları monda kilep nindider dini ekstremistlarnı tärbiälärgä tırışa. Şuşı sıltaw belän, mäsälän, kürşe Başqortstan respublikasında inde niçä yıllar buyı uñışlı ğına eşläp kilgän başqort-tatar litseyları yabıldı, anda belem birüçe uqıtuçılar da kire tuğan illärenä qaytıp kitte. Tatarstanda mondıyğa uq barıp citmäsä dä, tatar-törek litseylarınıñ eşçänlegen daimi räweştä tikşerep, küzätep toralar. Läkin Törkiäneñ mäğärif sisteması, ul birgän belem däräcäsennän qänäğät tatarstanlılar da yuq tügel. Mäsälän, şuşı könnärdä genä Azatlıq radiosınıñ Qazan byurosında qunaqta bulıp kitkän abıylı-señelle Ramil häm Gölnara Sabirovlar. Alar ikese dä Törkiädä yäşilär, Anqara universitetınıñ magistraturasında uqıylar. Ramil häm Gölnara – Çallıdan, ata-anaları äle haman da şunda yäşilär. Ä menä tağın ber apaların – Liliäne alar üzläre yanına kitärgä kündergännär. Xäzer ul Törkiä televideniesendä eşli ikän. Sabirovlar ğailäse öçen berençe bulıp Törkiägä yulnı Ramil açqan. 1993 yılda ul Tatarstannıñ Mäğärif ministrlığı tarafınnan oyıştırılğan bäygedä ciñep, Anqarağa uqırğa kitä. Tizdän anıñ yanına señlese Gölnara da kilep urnaşa. Şunnan birle alar Törkiädä yäşi. Bez millättäşlärebezdän, sez Törkiägä ozaqqa kittegezme, kiläçäktä Tatarstanğa qaytırğa cıyınasızmı dip soradıq.

Bu xaqta bik küplär soraw birä häm, berençe çiratta, çit ildä uqığan tatar studentları bu soraw üzlärenä üzläre birä. Döresen genä äytkändä, çit ildä berkem bernärsäne dä kiterep birmi, anda da problemalar bik küp. Bezneñçä, keşe qayda ğına yäşämäsen, ni genä eşlämäsen, üz millätenä fayda kiterä ikän – menä şunısı inde iñ möhime. Tatarlar bar dönyağa da taralğan häm alar Tatarstannı, tatarnı tanıtu buyınça küp kenä eş başqaralar. Bez dä şuşı yünäleştä eşlärgä niätlibez. Xäzer bit globalizatsiä waqıtı, dönya keçeräyä, İnternet kiñäyä. Qayda ğına yäşäsäñ dä, tuğan yağıñnan ayırılmasqa mömkin

Şulay itep, çit cirlärdä dä tatarlığın onıtmağan Sabirovlar üz xalqıña qayda da xezmät itep bula, dip sanıylar. Häm Tatarstannan bik yıraq yäşäsälär dä, monda yış bulalar. Çınlap ta, texnika häm informatsion texnologiälärneñ bügenge köndäge üseşe keşegä qayda ğına yäşäsä dä, tuğan cireñnän, moxitennän ayırılmasqa mömkinlek birä. Xäyer, Törkiädä tatarlar da az tügel bit. İnde telefon, İnternet aşa ğına tatarlar, tuğannar belän aralaşu citmäsä, andağı millättäşlärebez yärdämgä kilä ala. Şuña kürä bez studiä qunaqlarıbızdan Törkiädäge tatarlar, alarnıñ tormışı belän dä qızıqsındıq. Süzne bu yulı abıysı yanında tıynaq qına utırğan Gölnara başlap cibärde.



Tatarlar tormışı şaqtıy aktiv bara Törkiädä. Menä bıyıl äle İske Şähär yanında uzdırılğan Sabantuyda bulırğa turı kilde. İstanbulda İdel-Ural oyışması bik äybät kenä eşläp kilä, alar küptörle çaralar ütkärälär. Tatarstannan da artistlar kilgäli

Tatarlar şaqtıy yäşi Törkiädä. Monda elek 4 tatar awılı bar dip sanalsa da, bez kübräk aralaşa, beleşä başlağaç, tatar awıllarınıñ kim digändä 8 ikänlegen, monda xätta ber başqort awılı barlığın da açıqladıq. Alar inde 120-130 yıl elek qorılğan awıllar



Menä şulay itep, tatarlıqların onıtmıyça, kiresençä, üz milläteneñ tarixı, mädäniäte belän qızıqsınıp, anı öyränep yäşäp yatalar yıraq Törkiädä Çallıdan Sabirovlar - Ramil, Liliä häm Gölnara. Tatarstannan çitkä kitep tä, üzläreneñ kem ikännären onıtmıyça, tatarlığın isbatlap yäşäwçe millättäşlärebez bulğanda, tatarlar äle tiz genä yuğalmas digän ömet uyana.

Gölnaz İlgizär

XS
SM
MD
LG