6nçe avgust könne eçke eşlär ministrlığınıñ tikşerülär idäräse wäkilläre «Tormış partiäseneñ» Tatarstandağı bülege citäkçese Färit Xucixanovnıñ öyendä häm ul citäklägän maşina kibetendä tentü ütkärde. «Tormış Partiäse» tarafdarları bu tentüne säyäsi basım yasaw ısulı itep bäyäläde. Räfqät Altınbayev RTR kanalınıñ yañalıqlar xezmäte belän elemtägä çığıp, Qazandağı xällärgä üz añlatmasın birde. Läkin RTR kanalı xezmätkärläre hönär qağidälären bozmıyça, qarşı yaqnıñ fikeren dä beleşte häm Tatarstan eçke eşlär ministrlığınıñ mäğlümatın da yañğırattı. Respublika tärtip saqlawçıları, comğa 8nçe avgustta, cirle mäğlümat çaralarına da añlatmalar birde.
Şulay itep, Färit Xucixanov öyendä häm eş urınında bulğan tentülär prokuror röxsäte belän häm konkret cinayät eşe qısalarında ütkärelde. Älege cinayät eşe «Nijnekamskşina» şirkätennän 20 million sumnıñ urlanu säbäple açıla. Baş tikşerülär idäräseneñ ölkän tikşerüçese Sergey Cihanşin süzlärençä, bu eş nigezendä, ber keşe qulğa alına. Ul üz cawaplarında Färit Xucixanovnıñ, urlaşu eşendä qatnaşuın kürsätkän bulğan.Älege waqıtta tikşerüçelär Xucixanovnıñ bu eştä uynağan rolen açıqlaw belän mäşğül. İqtisad ölkäsendä qılınğan cinayätlärne tikşerüçe idärä başlığı Valeriy Kosenkov süzlärençä, alar öçen bu ğädäti eş. Läkin, gäyeplänüçelär aña säyäsi tösmer birergä tırışa. Bu xaqtağı xäbärlärne «Azatlıq» radiosında Eçke eşlär ministrlığınıñ matbuğat üzäge citkerde.
Bikä Timerova
