Accessibility links

шимбә, 10 декабрь 2016, Казан вакыты 06:18

«Tatnet yoldızları» bäygesenä näticä yasaw köne yaqınlaşa...


İñ yaxşı tatar internet säxifäse, iñ qızıqlı, iñ eçtäşlekle, iñ matur bizälgän, iñ şäp yäşlär säxifäse häm başqa şundıy isemnär 30nçe avgustta tämamlana torğan «Tatnet yoldızları» bäygesendä iğlan iteläçäk.

Bu bäygegä äzerlek inde küptännän bara. 1nçe aprel’ könne ğarizalar qabul itü başlandı, ä yünneñ urtasında tatar internetı problemalarına bağışlanğan forum buldı. Ul waqıtta Başqortstan, Çiläbe, Mäskäw häm kübesençä Qazan internetçıları bergä oçraşıp, eşlärendä oçrıy torğan mäs’älälär xaqında fiker alıştı. İnde xäzer, iñ yaxşılarnı bilgeläw eşe bara.

Jyuri äğzäse Älfiä Miñnullina äytüençä, bügenge köndä, bäygedä qatnaşırğa teläweçlär sanı 100ğä yaqın. «Tatnet yoldızları» bäygese andıy çaralarnıñ iñ berençese, şuña anıñ qıtırşı yaqları da bulırğa mömkin, dide ul.

Oyıştıruçılar bäygedä qatnaşuçılarnı 12 törgä bülep qararğa täqdim itä. Mäsälän, iñ yaxşı elektron mäğlümat çarası, kiril häm latin xäreflärendä yasalğan iñ yaxşı tatar saytı, törki dönya, din turında, yäşlär öçen, tarix, etnografiägä bağışlanğan internet säxifäläre digän törlärdä ayırım ciñüçelär bilgelänäçäk. Mäsälän, iñ yaxşı mäğlümat çarası iseme öçen, «Respublika Tatarstan», «Tatarskiy mir», «Tatarstan yäşläre», «Tatar dönyası» gäzitläreneñ internetta elenä torğan öleşe, «Tatar-İnform» belän «Tatnews» agentlıqları, «Watanım» radiosı saytları yarışa.

Yäşlärneñ iñ yaxşı saytı digän tördä «Yuldaş» säxifäse, «Qärdäşlär» digän Tatarstannan kilgän studentlar assotsiatsiäse , «Kerpe» studentlar gäzite, «MTSS» (Mäskäw tatar studentları cıyını), şulay uq, bu säxifädä «Yöräk paräm» isemle Mäskäw yäşläreneñ saytı da köç sınaşaçaq.



Bäygeneñ tatar muzıkası digän törendä, belgeçlär iğtibarına kübesençä, populyar estrada cırçılarınıñ icatına bağışlanğan web-säxifälär täqdim iteläçäk. Anda, mäsälän, Gölnara Timercanova, Salawat, Rinat İbrahimov, Aydar Ğalimovnıñ internet säxifäläre, mp3 formatındağı tatar muzıkası cielması, audiokasset häm CDlarnı internet aşa satuçı saytlar belän tanışıp bula.

Saytlarğa bäyä birüçe belgeçlär şurası, «Tatnet yoldızları» bäygeseneñ internet bitendä äytelgänçä, 3 keşedän tora. İntertat.ru elektron gäziteneñ baş möxärrir urınbasarı Älfiä Miñnullina, «Tatar gäzite»neñ citäkçese İrek Bikinnin, «Respublika Tatarstan» gäziteneñ wäkile Rafail Mirğazizov. Älegä bäygegä äzerlek eşläre bara, anda qatnaşuçılar häm täqdim itelgän internet säxifäläre xaqında bezneñ aldağı tapşırularda tulıraq itep söylärbez.

Bikä Timerova.

XS
SM
MD
LG