Accessibility links

якшәмбе, 11 декабрь 2016, Казан вакыты 07:09

Liberiä prezidentı Taylor çigenep ildän kitsä dä, solıx buldıru ciñel bulmayaçaq


Liberiä prezidentı Charles Tayler Düşämbedä prezidentlıq vazıyfasınnan çigende häm Nigeriägä möxäcirlekkä kitte. Üzen qorban itep kürsätkän Taylor kire qaytaçağın da äytergä onıtmadı. Läkin, prezidentnıñ kitüe belän ildä tınıçlıq urnaşaçaq dip äytü qıyın. Şulay da bu adım Liberiädä vatandaşlar suğışın tuqttauğa yardäm itä ala

14 yıldan birle vatandaşlar suğışınıñ cavaplılarınan, şulay uq kürşedäge Siere Leonede dä vatandaşlar suğışında barmağı bulğan Nigeriä prezidentı Taylor prezidentlıq vazıyfasınnan çigenep ildän kitte. Şuşı uñaydan ütkärelgän yolada prezident üzen Ğayse Peygember belän dä çağıştırdı, postınan xalıqara basım säbäple kitärgä mäcbür buluın häm qorbanlıq sarıq rolen qabul itüen dä äytte. İlne vatnadaşlar suğışına alıp baruı yaki xalıqara cinayätlär mäxkämäseneñ anı taläp itüen telgä almadı. Anıñ urnına üz taraftarları, öç afrika ile prezidentı häm jurnalistlar bulğan zalda Liberia xalqın qayğırtuçan şäxes rolen uynadı.

Audio

"Tarix mina raximle bulaçaq . Min Liberia xalqınıñ mänfäğätlären saqlau öçen üz vazıyfalarımnı ütädem."

Ul şulay uq mängegä kitmäven, forsatı çıqqan xäldä, yañadan xakimiätkä kilergä tırışaçağın da işarä itep bolay dide.

Audio

"Min şuşı süzlär belän saubullaşam. Allah teläsä kire qaytırmın."

Taylornıñ çigenüen häm ildän kitüen taläp itkän AQŞ prezident Buş bu xaqta bolay dide

Audio

"Çarles Taylornıñ bügen Liberiadan kitüe, Liberia xalqınıñ yaqxşıraq kiläçäge öçen möhim adım. AQŞ 10 yıldan artıq dävam itkän çualışlar häm cäfa çigülärdän soñ anda ezlekle tınıçlıq buldıru öçen Liberia xalqı häm xalıqara cämağätçelek belän xezmättäşlek itäçäk."

Läkin, Buşnıñ bu süzlärenä qaramastan, AQŞnıñ şuşı konfliktta nindi rol uynayaçağı äle açıq bilgele tügel. Liberia yarlarında öç amerikan xärbi köymäse torsa da, bu äle AQŞnıñ anda tärtip urnaştıruğa aktiv qatnaşaçağın añlatmıy. Bu eş küberäk afrika illäreneñ cilkäsenä töşäçäk kebek. Taylornıñ kitüe belän Liberiä tarixında ber säxifä yabılğan bulsa da, alda äle zur problemmalar tora. Anıñ urnın alğan visi-prezident Moses Blah, Taylornıñ yaqın keşese häm berektäşe häm qanqoyuda anıñ da öleşe zur buldı. Ul bu vazıyfanı vaqıtlı xökümät tüzelgänçegä yäğni Üktäber urtasına qädäre genä ütiäçäk. Şunnan soñ saylaular ütkäreläçäk. Läkin, moña ireşü öçen aldağı yul bik qatmarlı häm butalçıq. Başta vaqıtlı xökümätneñ kemnrdän toraçağı mäsäläsendä xökümät belän fetnäçelär kileşergä tieşlär. Humanitar yardäm öçen xäzer fetnäçelär qulında bulğan portnı açarğa kiräk. İn möhime ike yaqnıñ da köräşçelären qoralnı yañadan qulğa almauları öçen künderergä kiräk bulaçaq. Blah fetnäçelärgä visi-prezidenlıq postın täqdim itte. Ozaqqa suzılğan, küp qan qoyılğan häm suğışudan häm keşe üterüdän başqa närsä belmägän buın citeşkän cämğiättä, tatulıq, berdämlek häm tınıçlıq buldıru ber dä ciñel eş tügel.

Färit İdelle, Praga.
XS
SM
MD
LG