Accessibility links

сишәмбе, 6 декабрь 2016, Казан вакыты 11:22

Säyäsätçelär yäşlär yaqlawına ömet itä...


«Berdäm Rusiä»firqäse saylawlarğa nıqlap äzerlänä başladı. Xäzer bu oyışma çeltären nığıtu, Mäskäwdä bulası qorıltayğa wäkillärne saylaw belän mäşğül. Firqäneñ yäşlär qanatı da ölkän iptäşlärennän qalışmasqa tırışa. Sişämbe könne Qazanda, «Yäşlär berdämlege» oyışmasınıñ Qazan bülege yañadan oyıştırıldı.



Yäşlär forumında zurlar qorıltayında şikelle uq, plenar çığışlar häm citäkçelärne saylawlar buldı. «Yäşlär berdämlege» oyışmasınıñ Tatarstan bülege citäkçese süzlärençä, oyışmanıñ Qazan bülege naçar eşlägän, şuña xäzer iskesen taratıp, yañasın oyıştıru ixtiacı tuğan. Häm bu eş eşlände dä. Citäkçelär täqdim itelgän nämzät, küpçelek tawış belän saylandı. Qazan bülege belän idärä itäçäk şura isemlege dä aldan äzerlänep quyılğan ide, anı da zaldağılar saylap quydı.



Yäşlär eşläre ministrı urınbasarı, ni säbäple bu idärägä yäşlär oyışmaları ber dä kermägän, digän soraw birgäç, tağın 10 keşene saylarğa buldılar. Ämma bu borılışqa oyıştıruçılar äzer tügel ide. Aldan isemlek tä äzerläp quymağan ide. Ä zaldan teläweçlär ällä ni bulmadı. Näticädä, bu sorawnı ike atnağa qaldırıp torırğa buldılar.



Citäkçelek süzlärençä, firqäneñ töp maqsatlarınıñ berse xäzer – yaña äğzälär cälep itü. Häm monıñ öçen alar bik tırıştı da. Prezidiumda utırğan ministrlıq häm şähär xakimiätläre wäkilläre, firqäneñ Qazan bülege citäkçeläre – barısı da, çığış yasadı häm yäşlärne aktiv bulırğa, ictimaği tormışta qatnaşırğa, öndäp qaradı. Şähär başlığı urınbasarı Älfiä Tutayeva, äydäp baruçı köçkä äylänersez, il belän idärä itärsez, barığız da zur citäkçelär bulırsız, dip yegetlärne häm qızlarnı firqägä kerergä çaqırdı. Yäşlärne borçığan problemalarnı xäl itärgä dä, saylawlar nämzät itep qatnaşırğa da, firqä ütkärä torğan çaralarğa buşlay kerergä dä täqdim itep qaradılar. Läkin firqägä çirat torıp yazıluçılar kürenmäde.



Bu forumnı oyıştıru öçen xakimiätlär küp küç quyğan. «Aq bars» yäşlär üzägendä zal turında kileşkän, Qazan rayonnarı buylap, mäktäp, şifaxanä, sänäğät şirkätlärennän yäşlär wäkillären cıyıp kitertkän. Cıyılışnı da Qazan şähäreneñ yäşlär eşläre komitetı başlığı Albert Bikmullin üze alıp bardı. Xakimiätlär tırışlığı belän forumğa 353 keşe cıyılğan ide.



Zurlar qorıltayında şikelle uq, bu forumda da rezolyutsiä qabul itelde. Anda äytelgänçä, «Yäşlär berdämlege» oyışması Tatarstannıñ yäşlär säyäsäten häm «Berdäm Rusiä» firqäseneñ qaraşların tulısınça yaqlıy.



Bikä Timerova, Qazan.

XS
SM
MD
LG