Accessibility links

Кайнар хәбәр

Çallıda Tatarstan uqıtuçıları kiñäşläşä...


Respublikada bu atnada iñ möhim waqiğalarnıñ berse – Çallıda ütä torğan Tatarstan uqıtuçılarınıñ avgust kiñäşmäse. Älege cıyılış här yılnı Tatarstan mäğärif ministrlığı tarafınnan kiläse uqu yılına äzerlek räweşendä ütkärelä. Bıyılğı kiñäşmädä 800dän artıq keşe qatnaşa. Anda respublikanıñ mäğärif idäräläre, törle uqu yortları citäkçeläre, xakimiät başlıqları, xökümät wäkilläre genä tügel, ä Rusiäneñ başqa töbäklärennän kilgän wäkillär dä qatnaşa. Şunısın da äytep ütärgä kiräk. 14nçe avgust könne pedagoglar konferensiäseneñ eşenä respublika prezidentı Mintimer Şäymiev tä quşılaçaq. Ul kiñäşmäneñ plenar utırışında qatnaşaçaq, çığış yasayaçaq. Häm respublikanıñ Mäğärif ministrı Faris Xarisov belän bergälektä İnternet aşa bar teläwçelärneñ dä sorawlarına cawap biräçäk. Ägär dä sezne respublikadağı mäğärif üseşe qızıqsındıra yäki sezneñ sorawlarığız äzer ikän, räxim itep Mäğärif ministrlığınıñ räsmi saytına keregez. Anıñ adresı www.mno.knet.ru Bu ğämälne oyıştıruçılarnıñ eşe kilep çıqsa, sez Mintimer Şäymiev häm Faris Xarisovnıñ cawapların şul uq könne alaçaqsız. Şulay uq pänceşämbe könne kiñäşmädän turıdan-turı translyatsiädä dä bulırğa tieş. Konferensiäneñ barışın älege eşne oyıştıruçı Tattelekom şirkäteneñ saytınnan qararğa mömkin bulaçaq. Anıñ adresı – www.tattelecom.ru
XS
SM
MD
LG