Tatarstan prezidentı Mintimer Şäymiev çärşämbe, 13nçe avgust könne, Aqtanışta buldı. Xäbärçebez Mälikä Basıyr süzlärenä qarağanda, monda ul rayon belän tanıştı, citäkçelek belän oçraştı, yañartılğan säwdä üzägen qaradı. Şulay uq Mintimer Şäymiev Aqtanışta iñ yaña texnika belän cihazlanğan elemtä üzäge açu tantanasında qatnaştı. Bu elemtä üzäge eşkä kertelü belän aqtanışlılar yaña tör, sıyfatlı elemtä liniälärenä iä bulalar. Şulay uq alarğa zamança texnologiälär, İnternet belän qullanu da ciñeläyäçäk. Açu tantanasında çığış yasağanda Mintimer Şäymiev bu xaqta menä närsälär äytte.
Rusiädä berençe bulıp, respublikanı menä şundıy alğa kitkän texnologiälär belän tä’min itä başladıq. Çönki bez moña äzer. Äle respublikada yullar bulmasa, gaz kertelmägän bulıp, başqa töp mäs’älälär xäl itelmägän bulsa, bez mondıy eşlärgä totınmağan da bulır idek. Bez Tatarstanda xalqıbıznı mondıy yuğarı däräcägä kütärä torğan programmanı tormışqa aşırırğa äzer. Min aqtanışlılarnı şuşındıy zamança cihazlanğan elemtä üzäge açılu belän qotlıym.
Şulay itep, Aqtanışta xäzer qayber şähärlär dä qızığırlıq elemtä üzäge eşläp kilä. İnde alda äytkänebezçä, 14nçe avgust könne Mintimer Şäymiev Çallıda bulaçaq. Ä respublika buylap berniçä köngä çığıp kitär aldınnan ul Qazan kremlendä respublikada keşe xoquqları buyınça wäkälätle wäkil Räşit Wäğızov belän oçraştı. Oçraşuda süz Tatarstanda keşe xoquqların yaqlawnı kamilläşterü, ayıruça balalar xoquqların yaqlaw turında bardı.
