Accessibility links

дүшәмбе, 5 декабрь 2016, Казан вакыты 01:35

Uqıtuçılar konferensiäse, berençe tapqır, internet aşa tapşırıldı...


Web-konferensiä barğan 4 säğät eçendä «Tattelecom» säxifäse belän 1500 yarım tapqır elemtägä kergännär. Älege oyışma xezmätkärläre äytüençä, bu çara waqıtında şirkät yaña satıp alğan cihazların sınap qarağan. Barısı da yaxşı eşlägän ikän. Şulay uq, Arça, Tübän Kama, Çallı häm Qazan arasında video konferensiä elemtäse urnaştırıldı, dip belderdelär älege oyışmada. Şulay itep, «Tattelecom» kiläçäktä internet-konferensiälärne yış ütkärergä isäpläp tora.

«Azatlıq» radiosınıñ Qazan byurosı xezmätkärleläre dä älege adresqa totaşıp qaradı. «Tattelecom» bik yuğarı sıyfat wäğdä itsä dä, çınlıqta yaxşı tawış işetü häm sıyfatlı räsemne kürü bäxete küplärgä tätemäde. Bu internet-konferensiäne kürü – qüätle häm küp törle programmalar urnaştırılğan kompyuterlar öçen dä qıyın buldı. Oyıştıru eşlärendä dä citeşsezleklär bar ide. Konferensiä kürsäteläçäk tögäl adres ta uqıtuçılar cıyını başlanır aldınnan häm jurnalistlarğa ğına iğlan itelde. Şulay itep, internet aşa translyatsiä bulasın işetkän keşelär, anı qaydan tabasın belmäde. Telefon çeltäre iske bulğan binalarda da älege internet adresı belen elemtä urnaştıru mömkin bulmadı, dip xäbär itte bezgä ber kompyuter belgeçe.



«Azatlıq» radiosınıñ kompyuterına yaña programma quyğaç qına, internet konferensiäne, anda çığış yasağan keşelärne kürep häm işetep buldı. Tattelecom.ru saytında uqıtuçılar konferensiäse tapşırılsa, Tatarstan mäğärif ministrlığınıñ säxifäsendä sorawlar cıyılıp bardı. Mäsälän, Tallin şähärennän Albina isemle millättäşebez, «Estoniäneñ tatar yäkşämbe mäktäplärenä Tatarstan metodik ädäbiät belän yärdäm itä alamı?» digän soraw birgen ide. Mäskäwdän, Röstäm isemle internet qullanuçı beräw « Tatar internet portalı qayçan oyıştırılır?», dip qızıqsına. «Xakimiätlär informatika uqıtuçılarına eş xaqın kütärergä cıyınmıymı?» – dip sorıy Qayumov isemle uqıtuçı. Ayrat İbrahim «Ulyan ölkäseneñ mäğärif bülege Tatarstan belän tatar tele däresleklären kitertü xaqında kileşmäwen niçek añlarğa?» digän soraw yulladı. «Azatlıq» radiosı isemennän «Latinğa qaytu yünäleşendä Tatarstannıñ säyäsäte nindi?» digän mäs’älä quyıldı. İñ soñınnan, Maymıl iseme belen kergän ber keşe « Sayt nigä tatarça tügel?» dip açuın belderep kitkän.

Başta, internet-forumğa çıqqan sorawlar konferensiädä yañğıratılır häm şunduq cawap bireler dip iğlan itelsä dä, axır çiktä alay kilep çıqmadı. Soñınnan mäğärif ministrlığı wäkilläre belän elemtägä kerep, şunı beldek: Ministr Faris Xarisov konferensiädän Qazanğa äylänep qaytqaç, şunduq sorawlarğa cawap biräçäk ikän. Ministr cawapların şuşı uq mno.knet.ru saytında, anıñ forum bülegendä uqıp bulaçaq, dip wäğdä itelde.

Bikä Timerova.

XS
SM
MD
LG