Bügen Qırğızstan Yuğarı Mäxkamäse oppozitsiä citäkçese Feliks Kulovnı wazıyfasın yawızlarça faydalanuda ğäyepläp 10 yıllıq törmä cäzası bilgelägän tübänräk mäxkamä qararın ğämäldä qaldırdı.
Kulov tübänräk mäxkamädä tanılğan ğäyepläwlär artında säyäsät yata dip Yuğarı Mäxkamägä möräcäğät itkän ide.
Kulovnıñ advokatı Lübov' İvanova xäzer Qırğızstan Konstitutsion Mäxkamäsenä möräcäğät itäçägen belderde.
2001-nçe yılnıñ ğinwarında Kulov 90-nçı yıllar urtasında Çu ölkäse xakimiäten citäklägändä xakimiäten yawızlarça faydalanuda ğäyeple tabılıp törmägä yabıldı.
Kulov bu ğäyepläwlär barı tik xakimiättän kitep oppozitsiägä küçkäç kenä belderelde dip monı säyäsät belän bäyläp kürsätä.
Başqa ber oppozitsiä citäkçese Topçubek Turgunaliev Kulov eşen xalıqara mäxkamägä çığarırğa tırışaçağın belderde.
