Accessibility links

Кайнар хәбәр

Şamil Tarpişçev Mordowiäne xalıqara tenis üzägenä äyländerä


Mordowiäda, Saransk şähärendä, 4 augusttan 10 augustqa qädär professional tennisçılar assotsiatsiäsınıñ “Çellencer” seriäsınnan “Mordowiä quboğı”na tennis turnirı ütte. Bu turnirda Rusiädan häm tağı 25 ildän – Wengriä, Germaniä, İtaliä, İspaniä, Maqedoniä, Serbiä, Çexiä, Slowaqiä, Amerikä, Fransiä, Awstriä, Awstraliä, Uqraina, Belorussiä häm başqa illärdän sportçılar yarıştı. “Mordowiä quboğı” öçençe yıl inde uzdırıla, ämma bıyıl anıñ statusı yuğarıraq: uzğan yıllarda turnirnıñ däräcäse “Futures” (ingliz telennän tärcemä “kiläçäktägelär”) bulsa, bıyıl inde ul “Challenger” (inglizçä “yarışqa çaqıruçı”) däräcäsenä kütärelde. Älbättä, turnirnıñ priz fondı 25 meñ dollar ğına buluğa, dönya reytinğında yuğarı urınnarda toruçı tennisçılar monda kilmäde. Turnirda Rusiänıñ iñ bilgele bulğan tennisçılarınnan berse Andrey Çerqasov qatnaştı. Şulay uq Rusiäda xäzer 5 urında bulğan, ä dönya klassifiqätsiäsendä 134 urın alıp torğan İğor' Andreyev ta monda ide. Ämma, baştan uq äytep kitärgä kiräk, Rusiä tennisçılarınnan berse dä finalğa da, yarımfinalğa da eläkmäde. Turnir açılır aldınnan Rusiänıñ tennis federätsiäse räise Şämil Tarpişçev press-konferensiä ütkärde. Anıñ süzläre buyınça, Saranskidağı turnirnıñ däräcäse kütärelü yuqqa ğına tügel: monda balalar tennis mäktäbe eşläp kilä, anda 300dän artıq bala yöri, yuğarı kwalifiqätsiäle, täcribäle trenerlar eşli, tennis üzäge tözelep betä. Şämil Tarpişçev, armıy-talmıy ätise-änise tuğan Mordowiä öçen, Yenä awılı öçen tırışa. Anıñ tırışlığı bulmasa, Mordowiäda tennisnıñ mondıy kütärelüye genä tügel, bälki, zur tennis kem dä uynamas ta ide. Şämil Tarpişçevnıñ Mordowiäğa här kilüye turında ğäzetälar yaza, telewidenie kürsätä. Ul Mordowiä başlığı Niqolay Merquşkinnıñ yaqın dustı. Şämil Änwär ulı Torbeyewo rayonında urnaşqan Yenä awılın da onıtmıy, anda gel kilä, tuğan awılına uzğan ike yıl eçendä bik matur ber bua da tözep birde. Yenä awılı tatar dönyasına küp bilgele keşelär birde: rässam Äxmät Kitayıv, Tatarstannıñ 30 yıllardağı finans ministrı Xusain Tarpişçev, Bötendönya tatar liğasınıñ elekke prezidentı Ali Aqiş, emigratsiädäge mädäniät eşleklese Şämsiä Apaqay häm başqalar. Ämma alarnıñ berse dä Şämil Tarpişçev kebek Yenä awılına, Mordowiä Respublikına fayda kiterä almadı, alarnıñ berse dä böten Rusiäğa bilgele şäxes bulmadı. Turnirğa qaytsaq, anda finalğa elektä ber il bulğan ike ildän tennisçılar çıqtı: Çexiädan Martin Stepanek häm Slowaqiädan Mixal Martinyäk. Küräseñ, Çexoslowaqiänıñ ike ilgä ayırıluı alarğa zarar kitermägän, faydağa ğına bulğan. Çex Martin Stepanek ciñde häm 3600 dollar aldı. Slowaq Mixal Martinyäkqa 2120 dollar ğına eläkte. Martin Stepanek, wengr Bardoski belän bergä uynap, parlı razryadta da turnirnıñ çempionı buldı. Şulsı qızıqlı: yalğız razryadta finalğa häm yarımfinalğa çığuçılar bötenese slawyan illärennän bulsa da, Mordowiä telewideniesına küp sanlı intervyülarnı gel ingliz telendä birä bardılar. Küräseñ, “slawyan tuğannar” digän töşençä Rusiä xalqı öçen genä qäderle, “slawyan tuğannar” urıs telen tügel, ingliz telen öyränüne faydalıraq dip kürälär. Tağı ber keçkenä moment. İyül ayında Saranskiğa biznes täqdimnäre belän ber amerikän kilgän ide. Ul, Mordowiänıñ çit illär belän eqonomıyqa bäyläneşläre ministrı urınbasarı belän söyläşkändä, Saranskinıñ ber zawodına baru telägen beldergän. Tegese ğafu ütengän, çönki anıñ amerikän belän Saranskinıñ zawodlarına çığarğa waqıtı yuq ikän, alarnıñ çit illär belän eqonomıyqa bäyläneşläre ministrlığı tennis turnirına äzerlänü belän mäşğül ikän.

İrek Bikkinin, Mordowiä
XS
SM
MD
LG