Accessibility links

дүшәмбе, 5 декабрь 2016, Казан вакыты 03:37

Qızıl Bayraqta Salix Säydäşevne iskä aldılar…


Tanılğan tatar kompozitorı Salix Säydäşev istälegenä bağışlanğan bu bäyräm inde 4nçe märtäbä ütte. Yıldağıça bıyıl da avgust ayınıñ 3nçe şimbäsendä Yuğarı Oslan rayonınıñ Qızıl Bayraq awılına Qazannan teploxodta artistlar, yazuçılar, şağirlär, jurnalistlar cıyılıp kilde. Ğädättägeçä, bäyräm çarası räsmi öleştän başlanıp kitte. Anda çığış yasağan Tatarstannıñ mädäniät ministrı Salix Säydäşevneñ tatar mädäniätenä kertkän zur role, anıñ bay icadi mirası turında söyläde. Tatar xalqında sälätle keşelär, yaña, yäş talantlar bik küp, ä bu bäyrämnär isä şuşı yäşlärgä bezneñ xalıqnıñ bay mirasın tapşırırğa yärdäm itä, dide ul. Yuğarı Oslan rayonı xakimiät başlığı da qunaqlarğa häm rayondaşlarına qotlaw süzlären citkerde. Tantanada şulay uq kompozitornıñ küpsanlı tuğannarı da qatnaştı. Alar arasında Al’fred Säydäşev – kompozitornıñ ulı da bar ide. Ul bäyrämgä kilüçelärgä anıñ ätise – Salix Säydäşevneñ icatın onıtmağan öçen räxmätlären belderde.

Kompozitornıñ tuğannarınıñ istäleklärennän soñ, bäyrämneñ töp öleşe – konsert başlanıp kitte. Anıñ berençe kisäge Salix Säydäşevneñ muzıkasınnan häm aña bağışlanğan äsärlärdän tordı. Konsertnıñ ikençe öleşendä bäyrämgä cıyıluçılar Ğäliäskär Kamal teatrı artistlarınıñ çığışların kürdelär, Zilä Sönğätullina, Aydar Fäyzraxmanov, Lidiä Äxmätova, Rafail’ Säxäbiev başqaruında cırlar tıñladılar, Salix Säydäşev isemendäge üzäkneñ biü ansamble çığışın qaradılar. Qızıp qına kilgän tamaşağa kinät kenä kilep yawa başlağan yañğır qomaçawladı. Alay da bäyrämgä yaratqan cırçıları Älfiä Afzalovanıñ da kilgän buluın belgäç, xalıq anıñ da çığıp 1-2 genä cır cırlap kerüen soradı. Älfiä apa da ozaq qıstatıp tormadı. Yañğır astında, bii, bii 5-6 cır başqardı. Yañğırdan qurqıp taralışa başlağan tamaşaçılar säxnä tiräsenä yañadan cıyıldı. Alar tanış, yaratqan moñnarnı cırçığa quşılıp cırlap qına qalmadılar, ä Älfiä Afzalovağa çäçäklär, şokolad birdelär. Ä ber abzıy isä, xislärgä birelep cırçığa 500 sum aqça da tottırdı. Ul arada, ällä Älfiä apadan qurqıp, yañğır da tuqtadı. Xäyer, bäyräm waqıtı betep kilä ide inde. Konsertnı Xämdünä Timerğalieva häm anıñ yäş uquçısı İlham Şärif tämamladılar. Küñelläre bulğan Qızıl Bayraqlılar öylärenä taralıştı, ä başqaladan kilgän qunaqlar, alarnıñ da küñelläre şaqtıy bulğan ide, aq paroxodqa utırıp Qazanğa yul tottı.



Gölnaz İlgizär

XS
SM
MD
LG