Accessibility links

җомга, 9 декабрь 2016, Казан вакыты 08:56

Tatarstan mäğärif ministrlığı internet aşa cawap birä...




Ütkän atnadağı uqıtuçılar konferensiäseneñ internettağı translyatsiä waqıtında, forumnarğa çıqqan sorawlarğa şunduq cawap bireler, dip iğlan itelde. Ämma, axır çiktä alay kilep çıqmadı. İnternet aşa tapşıru buldı, ämma sorawlarğa konferensiä barışında cawap birü tormışqa aşmadı. Mäğärif ministrlığı mäğlümatlarına qarağanda, uqıtuçılar konferensiäsennän soñ forumdağı yazmalarnıñ barısı da käğäzgä bastırılıp, ministrğa tapşırıldı häm ul cawap birü öçen burıçlı keşelärne bilgeläde. Näticädä säxifädä berniçä sorawğa cawap kürende.

Mödäris Qayumov: «Rusiä qanunı mäktäpkä informatizatsiä öçen cawaplı direktor urınbasarı wazifasın kertüne kiñäş itä, bu eş Tatarstanda da başqarılırmı?», dip sorağan bulğan. Moña mäğärif ministrlığı: «Älege mäs’älä belem birü oyışmasınıñ xezmätkärlär sanınnan häm alar öçen qaralğan eş xaqı fondınnan çığıp xäl itelä», dip mäğlümat birä. «İnformatika uqıtuçılarına eş xaqın kütärü köteläme?» digän ikençe sorawğa tögälräk cawap birelä: «2003nçe yılnıñ 1nçe oktäberennän barlıq uqıtuçılarğa da 33% -qa eş xaqın kütärü kötelä. Şunıñ östäwenä, mäktäplärdäge kompyuterlarnı qarap häm tözätep torğan öçen, informatika uqıtuçılarına östämä tüläwlär qaralğan».

«Rusiä mäğärif ministrlığı urıs bulmağan xalıqlarnıñ tellären üsterü öçen närsä eşli?», dip qızıqsına ber millättäşebez. Moña Tatarstan wäkilläre : «Rusiä mäğärif ministrlığı milli tellärne üsterügä iğtibarlıraq bulsın ide», digän teläk belderä. Ayrat İbrahim «Tatar telen saqlaw yünäleşendä Tatarstan häm tatar dönyası arasında wäqälätlärne niçek büleşergä?» dip sorağan. Mäğärif ministrlığı wäkilläre yazğança, wäqälätlär Tatarstan mäğärif ministrlığı häm cirle belem birü oyışması arasındağı kileşü nigezendä bülenä. «Ulyan ölkäse mäğärif idäräseneñ tatar tele däresleklären soratmawın niçek añlarğa?» dip qızıqsınğan şul uq avtor. Mäğärif ministrlığı monı bolay añlata: 2003nçe yılda Ulyan ölkäse mäğärif idäräse tatar tele däresleklären buşlay cibärü xaqında möräcäğät itkän. Bu üteneç öleşçä qänäğätländerelgän. Tatarstan 6 024 sumlıq 285 tatar tele däreslegen cibärelgän. Ulyan ölkäse baş mäğärif idäräse çınnan da bıyıl kitaplar satıp almağan. «Çittäge tatar balalarına belem birü öçen Tatarstan ni eşli?» digän soraw birä Axmetoviç isemle ber internet qullanuçı. Mäğärif ministrlığı:«Kileşülär tözelä, kvotalar birelä, kitaplar taratıla», dip xisap tota. «Tallin yäkşämbe mäktäbenä metodik ädäbiät cibärä alasızmı?» digän mäs’älä quyğan Estoniä tatarları wäkile Al’bina. Şuşı süzgä qarşı: «Äye, sez yärdämgä ömet isä alasız, mäğärif ministrlığınıñ tieşle bülegenä möräcäğät itegez», digän cömlälär yazılğan. «Nigä sayt tatarça tügel?» digän belderügä, yılmayu bilgese belän bergä «açqa citmi», digän cawap birelä. Ä «Azatlıq» radiosı wäkilläre yullağan häm latin grafikasına qaytu turındağı sorawlar iğtibarsız qalğan. Ministrlıq wäkilläre wäğdä itkänçä, bu häm başqa şundıy çeterekle sorawlarğa cawap, atna axırına qädär birelergä tieş.



Bikä Timerova.

XS
SM
MD
LG