Accessibility links

җомга, 9 декабрь 2016, Казан вакыты 22:31

Bagdad şartlawın kem oyıştıru tiräsendä bäxäslär - amerikan yağı monı elekke xakimiat tarafdarları da eşli ala dip isäpli


Bagdadtağı BMO wäkillege urnaşqan binanı şartlatu öçen cawaplılıqnı äle haman berkem dä üz östenä almadı, xörmätle tıñlawçılar. Könbatış berektäşlärendä dä şartlaw artında kem toruwı xaqında anıq mäğlümat yuq. Şul bilgesezlek sürätendä qayber mäğlümat çaralarında törle farazlar mul kürenä.

Bagdadtağı amerikan tikşerüçeläre sişämbe şartlawın niçek itep oyıştırunıñ berençel süräten açıqlarğa tırışa, läkin alar älegä monıñ kem tarafınnan eşlänüwen äytä almıy. Quşma Ştatlarnıñ Federal'' tikşerenülär idaräse FBİ-nı wäkillek itkän Thomas Fuentes çärşämbe könne xäbärçelärgä, şartlawnıñ KamAZğa töyälgän häm elekke sovet bombasınnan alınğan 225 kilo şartlatqıç, häm äle şuña östäp yartı tonnalap başqa törle suğış kiräk-yarağın qullanıp başqarıluwın äytte. Anıñ süzlärenä qarağanda, bu intihar, yäğni oyıştıruçınıñ üz-üzen üterep eşlägän höcümgä oxşıy, çönki anıñ şartlawğa qädär şul urınnan kitüwe açıqlanmağan.

Audio, Thomas Fuentes 66

"Bez monıñ intihar höcüm bulu ixtimalına ışanabız, çönki maşina cimerekläre arasında häm tirä-yündä keşe gäwdäse qaldıqları bar, bez alarnı taptıq häm xäzerge waqıtta şul qaldıqlarnı tikşeräbez" dip belderde FBİ-nıñ Ğiraqtağı wäkile Thomas Fuentes. Ul şulay uq, şartlaw dälilläre yaqın könnärdä maxsus tikşerü ütkärü öçen FBİ-nıñ Waşingtondağı sınaw üzägenä cibäreläçäk dide. Şunnan soñ ğına şartlawnıñ intihar höcümçe tarafınnanmı, ällä inde çittän torıpmı yasaluwın açıqlap bulaçaq. Ä älegä şuşı höcüm artında kemnär toruwı xaqında törle farazlar ğına belderelä. Berençe bulıp şiklänelgän taraflar isemlegendä radikal'' islamçılar tora. Ğiraqnıñ amerikannar bilgelägän waqıtlı İdarä Şurası äğzası, kördlärneñ Watandar berlege citäkçese Cäläl Talabani bolay dip belderä.

Audio, Cäläl Talabani

"Bezneñçä, bu ğämäl fundamental'' möselmannar yäisä Söğüd Ğäräbstanınnan, "äl-Qaidä"dän, "Änsar äl-İslam"nan kilgän radikallar, başqa şundıy fundamentalist terrorçılar tarafınnan başqarılğan" di körd citäkçese Talabani. Ul monı, Ğiraqnıñ çikläre xäzer açıq, çit terrorçılar şuñardan faydalanıp ciñel genä ilgä ütep kerä ala dip añlata. Läkin elek New York politsiäsen citäklägän, ä xäzer Ğiraqta yaña xakimiatneñ tärtip saqlaw köçlären buldıru eşen alıp barğan Bernard Kerik, nindi dä bulsa ayırım ber tarafnı ğäyepläw älegä irtäräk, min iğtibarnı fäqät islamçılarğa ğına yünältmäs idem dip belderde. Ul, Berläşkän Millätlär wäkillege binasına yasalğan höcüm artında elekke xakimiat, Saddam tarafdarlarınıñ buluwı da bik mömkin dip uylıy. Quşma Ştatlarnıñ "New York Times" basması da, FBİ tikşerenüläreneñ berençel näticälärenä tayanıp, qayber amerikan wäkilläre höcümneñ çittän kilgän islam radikalları tügel, ä Ğiraqnıñ elekke xärbiläre yasıy ala, çönki anda Saddam ğäskärlärendäge qorallar qullanılğan dip yaza. Çit illärdän kilgän islamçılar mäs''äläsendä isä "New York Times" şulay uq ber räsmi wäkilneñ, alarnıñ älegä Ğiraqta andıy zur şartlaw yasarlıq oyışu däräcäse yuq digän süzlären kiterä. Berläşkän Millätlärneñ Bagdadtağı wäkillege binasına höcüm berençe genä tügel, elegräk näq şundıy uq şartlaw İordaniä ilçelege yanında da oyıştırılğan ide.

Kärim Kamal, Praga
XS
SM
MD
LG