Accessibility links

сишәмбе, 6 декабрь 2016, Казан вакыты 08:46

«Räşit Näcmetdinov qabatlanmas şaxmatçı ide, yäşlär annan öyränergä tieş...»


Qazanda şawlap-görläp spartakiada yarışları bara. Atta yörüçe sportçılar bäygelären ütkärde inde, cilkänle köymälärdä dä final yarışları bulıp ütte. Çärşämbe könne ger kütärü, waterpol uyınnarı açıldı. Ä pänceşämbe, 21nçe avgustta şaxmat turnirları başlanıp kitte.

Räşit Näcmetdinov isemendäge şaxmat mäktäbendä dä, uyın barğan waqıtta, qırıyda borçılıp torğan änilärne häm yäş şaxmatçılarınıñ ostazların kürep buldı. Anda, irtänge yaqta, qızlar häm yegetlär turnirları başlanıp kitte. Yarışlarnıñ baş sudyası Yakov Damskiynıñ äytüenä qarağanda, şuşı şaxmat mäktäbendä uyınnar 10 kön däwamında ütäçäk. Barlığı 100gä yaqın uyınçı kön sayın şaxmat taqtaları yanında köç sınayaçaq. Final uyınnar bulğaç, biredä Mäskäw belän Peterburgta häm 7 federal okrugta inde yarım finalda ciñgän cıyılma komandalar qatnaşa. İdel buyı federal okrug komandasında Tatarstan isemennän xalıq ara şaxmat federatsiäse masterı Tamara Çistyakova, Ekaterina Parxomenko, Marat Äskärov häm Boris Modestov kebek masterlıqqa kandidatlar çığış yasıy. 14-16 yäşlek qızlar, uyğa batıp utırğan çaqta, «Azatlıq» radiosı xäbärçese yarışlarnıñ xakime Çunakov Valeriy Stepan ulı belän söyläşep aldı. Ul bu yarışlarnıñ möhim buluın häm ciñüçelärdän kiläçäktä grossmeysterlar üsep çığu mömkinlegen bilgeläp ütte. Şunda uq, 14 yäşlek Karina Ambaxtsumova belän dä tanıştıq. Ul da ğadi qız ğına tügel, täcribäle şaxmatçı, 8 tapqır Tatarstan çempionı bulğan, Rusiä häm Evropa yarışlarında qatnaşqanı bar. Xäzer Karina Evropa çempionatına äzerlänä. Ul anda qatnaşıp qına tügel, ciñep qaytırğa da teli. Şulay uq, Karina ber seren dä açtı. Ul Gari Kasparov, Yudit Polgar häm Alisa Gällämovağa oxşarğa xıyallana ikän.

20nçe avgustta kiç şaxmat yarışları 4 yaqlı tele küper tözü belän başlanıp kitte. Qazannan anda şaxmat mäktäbennän yäş uyınçılar, üzeneñ eş bülmäsennän Tatarstan Prezidentı Mintimer Şäymiev, Mäskäwdän – Rusiä şaxmat federatsiäse citäkçese Aleksandr Jukov häm Dordmund şähärennän dönya çempionı Vladimir Kramnik qatnaştı. Mäskäwdän uyınçılarnı şulay uq xalıqara grossmeyster Yuriy Averbax da sälämläde. Ul üzeneñ çığışında elekke yarışlarnı häm tatar şaxmatçısı Räşit Näcmetdinovnı cılı süzlär belän iskä aldı. «Räşit Näcmetdinov bik sälätle, qabatlanmas şaxmatçı ide, ul ğäcäyep kombinatsiälär qora belde. Yäşlärgä anıñ kebek osta şaxmatçılardan öyränergä kiräk», - dide Yuriy Averbax. Bügen başlanğan yarışlar 9 öleştän toraçaq, soñğı näticä yasaw häm büläkläw tantanası 31 avgustta planlaştırıla.

Bikä Timerova.

XS
SM
MD
LG