Accessibility links

якшәмбе, 4 декабрь 2016, Казан вакыты 15:18

Färit Möxämmätşin «Berdäm Rusiä» firqäseneñ Tatarstan bülege başlığı itep saylandı...


25 avgust könne «Aq bars» yäşlär üzägendä «Berdäm Rusiä» firqäseneñ Tatarstan bülege III çirattan tış konferensiäsen ütkärde.

Anda parlament häm «Tatarstan -yaña ğasır» xäräkäte citäkçese Färit Möxämmätşin «Berdäm Rusiä» firqäseneñ Tatarstan bülege başlığı itep saylandı. Elekke citäkçe Yuriy Näcmiev, mötdäte tämamlanmasa da, üzeneñ wazifa başqaruın tuqtattı.



2 aylap elek, «Tatarstan - yaña ğasır» xäräkäte üzeneñ 4 yıllığın bilgeläp ütkändä, anıñ citäkçese Färit Möxämmätşin bernindi firqä belän quşılmıybız digän ide. 25nçe yüldä «Tatarstan - yaña ğasır» «Berdäm Rusiä» firqäsen häm anıñ räistäşe Mintimer Şäymievnı yaqlawı xaqında belderde. Häm ul waqıtta respublika xäräkäte häm şuşı Rusiä firqäse tigez xoquqlı säyäsi berlek tözi dip iğlan itelde. Färit Möxämmätşinnıñ «Berdäm Rusiä» belän tığız xezmättäşlek itüe xaqında qarar şul waqıtta qabul itelgän dip farazlap bula. 25nçe avgust konferensiäsennän soñ, matbuğat oçraşuında ul jurnalistlarğa üzeneñ äğza biletın kürsätte. Parlament räise firqäneñ Qazan bülegenä inde 7nçe yüldä qabul itelgän bulğan ikän. Möhim xäbär tiz tarala digändäy, konferensiägä cıyılgan däräcäle keşelär öçen firqä citäkçeneñ alışınuı da yañalıq bulmadı şikelle. Tatarstan Prezidentı Mintimer Şäymiev üzeneñ çığışında bu üzgärtep qorularnıñ säbäplären añlatırğa tırıştı. «Xäzer partiälär çorı» dide ul, «mäs’äläneñ bäyäse bik zur», «başqa yul yuq» dip tä süzen däwam itte. Konferensiädä qatnaşuçılar Tatarstan Prezidentınıñ täqdimen xuplap, Färit Möxämmätşinnı partiäneñ Tatarstan bülege citäkçese itep saylap quydı. 330 saylawçınıñ 297-se anı yaqlap tawış birde, 28-se qarşı çıqtı. Tänäfestä söyläşkän waqıtta, Çırmeşän rayonı başlığı Minsağit Şakirov citäkçe almaşunıñ kötelgän xäl buluın belderde. Saylawlar aldınnan, däräcäle, abruylı, respublikada häm annan çittä tanılğan keşeneñ partiäneñ yözen bilgeläwe tabiği xäl dide ul.

Çırmeşän häm başqa respublika rayonnarında «Tatarstan -yaña ğasır» xäräkätenä häm «Berdäm Rusiä» firqäsenä yış qına ber ük keşelär kerä. İnde xäräkätneñ yazmışı nindi bulır, digän sorawğa, Tatarstan prezidentı aqçılıq kertte. Federalizmnı yaqlaw öçen xäräkätneñ saqlanuı kiräk, dide ul. Yäğni Färit Möxämmätşin ike säyäsi köçneñ dä başlığı bulıp qalaçaq.

Tatarstandağı xällärgä çittäge millättäşlärebez dä bitaraf tügel. Mäsälän konferensiädä «Berdäm Rusiä» firqäseneñ Üzäk Säyäsi şura äğzası, eşmäkär İlyas Möslimov ta qatnaştı. Ul, bezneñ belän söyläşüdä, respublika citäkçelegeneñ ziräklegenä soqlanu belderde.

Konferensiädä, firqäneñ töp burıçı – yaqlawçılar häm äğzalar sanın arttıru dip iğlan itelde. Bu maqsatqa törle yul belän ireşep bula. Mäsälän, Säyäsi Şura äğzası Oleg Morozov firqäneñ saylaw aldı programması belän qızıqtırdı, şulay uq Mintimer Şäymiev saylawçılar belän nıqlap eşlärgä kirägenä basım yasaldı.

Färit Möxämmätşin üze, soñınnan bulğan matbuğat oçraşuında, bik awır eçkä alınuın häm bik zur ışanıç kürsätkän öçen anıñ saylağan keşelärgä räxmätle buluın xäbär itte.

Bikä Timerova.

XS
SM
MD
LG