Accessibility links

чәршәмбе, 7 декабрь 2016, Казан вакыты 01:02

Ğiraqta kürenekle şiği din ähelenä terror höcüme buldı


Yäkşämbe könne Ğiraqta, şiğilarnıñ izge şähäre Nacafta iñ tä''sirle şiği din ähelläreneñ berse Möxämmät Säid äl-Häkimneñ yortı şartlatıldı.

Ğiraqtağı iñ kürenekle şiği din ähelläreneñ berse, 67 yäşlek Möxämmät Säid äl-Häkimneñ öyen kem şartlatqanı äle dä açıq tügel. Xäbär agentlıqları äytüençä, 4 ir maşinada ütep barışlıy, äl-Häkim üzeneñ ulı belän yal itä torğan bülmä diwarı yanına, yortnıñ tışqı yağına gaz balonı taşlap qaldırğan. Tän saqçıları balonğa ut törtelgän buluın ğına kürep qalğan häm balondağı gaz şunda uq şartlağan. 2 tän saqçısı, 1 xezmätçe hälak bulğan, äl-Häkimneñ muyını sıdırılğan.

Xäzer bu höcümne anıñ ğailäseneñ doşmannarı oyıştırğan bulırğa mömkin dip isäplänelä. Şul uq waqıtta Ğiraqtağı älege bik kürenekle ğailäneñ doşmannarı da bik küp. Äl-Häkim şaqtıy tä''sirle din ähelläre ğailäsennän. Anıñ tuğanı Ayatulla Möxämmät Baqer äl-Häkim Ğiraqta İslam İnqilabı Yuğarı Şurası dip atalğan iñ quätle şiğilar oyışmasın citäkli.

Elek bu törkem cit illärdän torıp küp yıllar buyı Säddam Xösäin xakimiätenä qarşı köräş alıp bardı. Säddam bärep töşerelgännän soñ ul koalitsiä köçläre belän xezmättäşlek itärgä äzerlek belderde. AQŞ bilgeläp quyğan 25 keşelek Ğiraq İdarä Şurasında älege törkemnän dä ber wäkil bar. Ämma höcümgä duçar bulğan Möxämmät Säid äl-Häkimneñ räsmi räweştä bu oyışma belän ber bäyläneşe dä yuq. Ğiraqta İslam İnqilabı Yuğarı Şurası din ähelen Säddam tarafdatları üterergä telägän dip belderde. Şul uq waqıtta küp kenä küzätüçelär fikerençä, äl-Häkimne amerikannar belän xezmättäşlekkä qarşı çığuçı başqa ber şiği din ähelläre ğailäse ütererergä telägän bulırğa mömkin. Andıy şiklelär isemlegendä berençe urında, şulay uq kürenekle Möxämmät Sadiq äl Sadr ğailäse tora. Äl-Sadr ğailäse isä bu ğäyepläwlärne kire qağıp uqnı Säddam tarafdarlarına borırğa tırışa. Näticädä bu bilgesezlek şiğilarnıñ ber-bersenä ışanmawçanlığın tağın da köçäytep Ğiraqta totrıqlılıq urnaştıru eşen tağın da qıyınlaştıra diärgä mömkin.

Ul arada WSJ gazetı Ğiraqta AQŞ räsmiläreneñ elek Säddamğa xezmät itkän küzläw agentların üzlärenä cälep itügä kereşüe turında yazıp çıqtı. Gazet yazuınça, Muxabarat küzläw xezmäte belän bäyle ğiraqlılar yözläp elekke yuğarı küzläw xezmätkären eşkä cälep itü inde 2 atnadan artıq elegräk başlanıp kitte dip äytä. Bu eş xäzer koalitsiä köçläre urnaşqan Säddamnıñ elekke prezident sarayı binasında bara. Gazet xäbärçese belän söyläşkän ber ğiraqlı, Muxabarat yardämennän başqa amerikannar bu ilne tınıçlandıra almayaçaq, bu keşelärdä bik küp mäğlümät bar häm xäzer alar aqçağa bik nıq moxtac dip äytkän.

Ğiraqtağı AQŞ administratsiäse başlığı Paul Bremer da Ğiraqta kübräk ğäskär tügel, ä küzläw mäğlümätläre belän näticäleräk eş itü, kübräk ğiraqlılarnı yardämgä cälep itü möhimräk dip belderde.

Naif Aqmal, Praga.
XS
SM
MD
LG