Accessibility links

җомга, 9 декабрь 2016, Казан вакыты 16:31

Tatarstanda bıyıl 30 yaña mäktäp açılaçaq...


Respublikada 1nçe sentäber räsmi räweştä yal köne dip iğlan itelsä dä, uquçılar, bigräk tä berençe uqu könen tüzemsezlek belän kötüçe mäktäp busağasın täwge märtäbä basuçı balalar, Belem bäyrämsez qalmayaçaqlar. Tatarstannıñ barlıq mäktäpläre dä 1nçe sentäber, düşämbe könne üz işeklären açıp cibäräçäk. Ä xäzergä älege uqu yortlarında soñğı tözekländerü, äzerlek eşläre alıp barıla. Mäğärif ministrlığı mäğlümatlarına qarağanda, respublikada 2002-2003nçe uqu yılında 2 506 mäktäp eşläp kilgän. Bıyıl alarğa tağın 30ğa yaqın östäläçäk. Alarda 10 meñgä yaqın bala belem alaçaq. Şuşı yaña mäktäplärneñ 17se 1nçe sentäber könne açılaçaq. Qalğannarı isä – yıl däwamında safqa basaçaq. Bu xaqta sişämbe könne Ministrlar Kabinetında ütkän brifingta Tatarstannıñ Mäğärif ministrı Faris Xarisov äytte. Mäktäplärneñ qayberläre inde açıldı da. Mäsälän, Qaybıç rayonınıñ İske Täberde rayonında küptän tügel genä şuşı uñaydan zur bäyräm oyıştırıldı. Uqu yortın açu tantanasına prezident Mintimer Şäymiev tä kilgän ide.



Şunısın da äytep kitik, bıyıl respublika mäktäplärendä barısı 500 meñnän artıq bala belem alaçaq. Şularnıñ 38 meñe – berençe klassqa kerüçelär. Bu balalarnı mäktäplär niçek qarşı alır soñ? Mäktäplär yaña uqu yılına äzerme? Jurnalistlar belän oçraşuda Faris Xarisov bügenge köndä respublika mäktäpläreneñ 67 protsentı ğına sentäberdän başlanaçaq uqu yılına tulısınça äzer, dip äytte. Ä başqaları? Belem bäyrämenä qädär qalğan 4-5 köndä alar äzer bulırmı? Bu sorawlar belän bez Mäğärif ministrlığınıñ matbuğat üzäge citäkçese Rezidä Korçaginağa möräcäğät ittek. Rezidä Korçagina süzlärenä qarağanda, çınbarlıqta xällär alay uq qurqınıç tügel. Bu san respublika mäktäpläreneñ 33 protsentı uqu yılına äzer tügellekne añlatmıy. Älege mäktäplär bügenge köngä barı tik qabul ğına itelmägännär. 29nçı avgustqa qädär barlıq uqu yortları da xakimiät wäkillärennän torğan komissiä tarafınnan tikşerelep betärgä tieş. Läkin alar qabul itelep, üz işeklären waqıtında açsalar da mäktäplärneñ material xäle, texnik cihazlanu däräcäse is kitärlek tügel. Bu inde, üz çiratında, uquçı balalarnıñ sälämätlege qaqşawnıñ ber säbäbe bulıp tora. Tatarstan Sälämätlek ministrlığı mäğlümatlarına qarağanda, xäzerge köndä uquçı balalarnıñ barı tik 14 protsentın ğına sälämät dip äytep bula. Qalğannarı isä, tege yäki bu awırudan integä. Xäyer, älege xäl respublikanıñ probleması ğına dip äytep bulmıy. Rusiädä mäktäplärneñ, ğomumän mäğärif ölkäseneñ xäle şäptän tügel.

Balalar sälämätlege temasın däwam itep, sezgä tağın ber mäğlümat citkeräse kilä. Tatarstanda “Prikosnis’ k serdtsu rebenka” – “Bala yörägenä orın” dip isemlängän aksiä bara. Anıñ qısalarında 170 meñ sumnan artıq aqça cıyılğan. Älege aqçalar yöräk zäğiflegennän integüçe balalarnı däwalaw öçen totılaçaq. Şuşı uq aksiä qısalarında Mäskäwneñ Bakulev isemendäge yöräk xirurgiäse üzägeneñ tabipları, yöräk awıruların däwalaw ölkäsendä tanılğan belgeçlär 29nçı avgustta Qazanğa kiläçäk. Alar respublikadağı awıru balalarnı tikşerep, konsul’tatsiälär ütkäräçäk.

Gölnaz İlgizär

XS
SM
MD
LG