Accessibility links

якшәмбе, 4 декабрь 2016, Казан вакыты 15:28

Spartakiadadan Tatarstanğa nindi fayda bar?




Tatarstanda ütä torğan Bötenrusiä uquçılar spartakiadası öçen Tatarstan byudjetınnan 54 million sum bülep birelgän, ä Federal Üzäk barı tik 41 millionnı ğına sarıf itkän. Läkin, Rusiä üz çığımnarın Tatarstannıqı belän tigezlärgä tieş, dip belderde Tatarstannıñ sport häm yäşlär eşläre ministrı Marat Bariev. «Keçe olimpiada» dip yörtelä torğan bu sport bäygelärennän soñ Tatarstanğa ni qala? Jurnalistlar belän sişämbedä bulğan oçraşuda, ministr kübesençä şul sorawğa cawap birde.



Sport mäktäplärendä xäzerge olimpiadada çempionnarınıñ äti-äniläre şöğellänä başlağan waqıttan birle cihazlar yañartılmağan ide, dip söyläde jurnalistlarğa sport ministrı Marat Bariev. Misal itep il gimnastika mäktäben kiterde. Spartakiadağa birelgän aqçalar yärdämendä ozaq yıllar buyı yañartılmağan binalarğa da can kertergä mömkinlek tudı. Mäsälän xäzer Qazanda basketbol häm voleybol bäygelären ütkärer öçen, şuşı arada açıla torğan «Basketbolxol»nı sanamağanda, yuğarı taläplärgä cawap birä torğan 3 zal barlıqqa kilde.



Spartakiada qısalarında işkäklär bäygeläre ütkännän soñ, Qaban külendä maxsus sport bazası buldırılaçaq. Döresräge iskese rätkä kiteräläçäk. Üzgärtep qorulardan soñ Üzäk stadionda xalıqara däräcädä ciñel atletika yarışların ütkärep bulaçaq. Yögerü yullarınıñ sıyfatı Rusiädä iñ yuğarı bulıp ta, yarışqa äzerlänü öçen tağın ber yögerü yulı bulmaw arqasında Qazanda däräcäle bäygelär ütkärelmägän bulğan. Xäzer şuşı citeşsezlekne beterü eşe bara. At çabışları häm başqa atlı bäygelär öçen dä şartlar yaxşırdı xäzer Qazanda. Sportçılar da bar. Mäsälän, Spartakiadada Mäskäw häm başqa şähärlärdän kilgän caydaqlarnı äle yaña kertelgän «konkur» törendä «Aq tübä»dän ğadi awıl yegete ciñgän bulğan.



Tanılğan sportçılarnı kürü dä yäşlärgä zur tä’sir yasarğa mömkin. 29nçı avgustta Qazanğa Rusiäneñ sport komitetı räise Vyaçeslav Fetisov häm ber törkem dönya, olimpia çempionnarı kilä. Ä 30nçı avgustta, xätta, xalıqara olimpia komitetınıñ elekke citäkçese Xuan Antonio Samarançnıñ da Tatarstanğa kilüe kötelä. Alar barısı da Üzäk stadionda ütäçäk Spartakiadanıñ tantanalı açılışında qatnaşır, dip uylanıla.



Şul uq waqıtta bäygelär oyıştıru häm däräcäle qunaqlarnı qabul itü, Tatarstan öçen küpmeder däräcädä Qazannıñ 1000 yıllığı aldınnan ber künegü bulıp tora. Ä sınalır öçen alda tağın ber säbäp – 30nçı avgust bäyräme bar. Näticäsen waqıt kürsäter.

Bikä Timerova.

XS
SM
MD
LG