Accessibility links

пәнҗешәмбе, 8 декабрь 2016, Казан вакыты 23:19

Fälästin cirendä barğan xakimiät köräşe turında


Fälästin citäkçese Yasir Arafat milli iminlek kiñäşçese itep Jibril Rajoubnı bilgeläde.Y.Arafat belän premier M.Abbasnıñ iminlek köçlären kontrol mäsäläsendä ber berse belän köräşüläre sonğı çiktä här ikeseneñ dä pozitsiälären zäğiflätäçäk , bu isä radikal törkem Hamasnıñ faydasına bulaçaq. Fälästin cirendä barğan xakimiät köreşe turında

Y.Arafat Könbatış Üzäneneñ eleke iminlek citäkçese general brigadir Jibril Rajoubnı milli iminlek mäsälälärendä kiñäşçe itep bilgeläde. Arafat 2002nçe yılda Rajoub belän talaşıp, anı urınınnan quğan bulğan. Premier M.Abbas häm anıñ iminlek köçläre citäkçse Möxämmäd Dahlan barlıq iminlek köçläre östennän kontrol urnaştıru mäsäläsendä Arafat belän bäxäsläşep kilälär.Fälästinnärneñ 35meñ keşelek iminlek köçläre, küzläü idaräse , çik saqçıları Arafat kontrolendä torsa, azıraq täsirle sivil politsiä saqlanu köçläre , häm terrorğa qarşı aldan çaralar kürüçü köçlär Abbas qaramağında. İzrael belän AQŞ kübräk köçlärne Abbas häm Dahlan kontrolenä quyu öçen tırışılıq alıp barsa da , Arafat qarşılıq kürsätep kilde häm fälästin İminlek Köçlären yañadan oyıştıru, reformalar eşe öçen Rajoubnı bilgeläp quydı. Bu adım älbättä Abbas belän Dahlannıñ Hamas häm islamçı Cihad kebek törkemnärgä qarşı köräşen zäğiflätä. Jibril Rajoub düşämbedä Ramallada bolay dip söyläde (audio) bez böten iminlek sisteması häm xezmätlärne yañadan oyıştıru turında il häm xalıqara cämäğätçelek aldında yäklämälär aldıq. Älege xökümät sonğı 4 ay eçendä bu mäqsatqa ireşü öçen tırışılq alıp bardı.Ni qızğanıç ki alar uñışlı bulmadı iminlek citäkçeläre yäki politik citäkçelektäge upqın kiñäyde genä. Jurnalistlarnıñ radikallärgä qarşı şunduq köräşä başlıysızmı digän sorauına Rajoub küz kürer, bez äle eşkä yaña ğına totınabız digän cawap qaytardı. Cibril Rajoub Arafat citäkçelegendä oyıştırılaçaq milli iminlek şurası, iminlek köçläre häm anıñ citäkçeklegen reformalau eşen alıp baraçaq, şura şulayuq kuartet ( yäğni AQŞ; BMO Russiä Yevropa Berlege) belän xezmättäşlekne ,tınıçlıq planınıñ ğämälgä quyuluın qarap baraçaq dip söyläde.Rajoub min häm Dahlan şuranıñ başqa äğzaları kebek ber tigez xoquqlı bulaçaqbız dip tä östäp quydı. M.Abbas ofısı Cibril Rajoub turında ber nindi dä komentar birmäde . Dahlannıñ atna azaığnda Gaza Sızığında Hamasqa qarşı kürgän çaraları, qorallarnı konfiskatsiäläwe, qoral kontrabanda tünelen yabuı kebek çaralar älbättä Hamasnıñ politik bazasın yuq itmiäçäk . Ul intifada başlanğannan birle kiñäyep üstte. Dahlan şulayuq radikal felästin törkemnären finansiälägän 10lap bizenes menne qulğa alğan. Alar Farsı Qultığındağı baylar belän aradaşçılıq itkän. Hamasnıñ sonğı aylardağı eşçänlege , Abbasnıñ İzraelgä höcümnärne tuqtata almawın , anıñ sälätsezlegen kürsätte. 19nçe augustta Yerusalemdä 20dän artıq keşeneñ häläk buluına kitergän intihar höcümennän soñ däwlät sekretarı C.Powell, älegäçä persona non grata möğämäläse kürsätelgän Arafatqa şaltıratıp radikallärne kontrol mäsäläsendä Abbasqa yardäm itergä soradı. Bilgele bulğança AQŞ belän İzrael Arafatnı izolatsiädä qaldıru öçen quldan kilgän här närsäne eşläde, ul aylarça cimerelgän başkvartirasında utsız susuz qaldırıldı , nixäyät Arafat premier bilgelärgä mäcbür itelde.Ämma Arafatnı izolätsiäläw kiresençä fälästinnär arasında anıñ popularlığın, abruyın arttırdı. Fälästin radikal törkemnäreneñ Abbasnı da Dahlannı da tıñlarğa cıyınmawı bilgele.C.Powellnıñ Arafatqa şaltıratuı Waşington aldında Abbasnı uñaysız xäldä qaldırdı...bu qartayğan fälästin citäkçeseneñ küptän kötkän politik uñış buldı. Xäzer ul Jibrel Rajoubnı bilgelep iminlek köçlären reforlım dip alarnı tämam üz kontrole astına quyaçaq. Arafat belän Abbas kontrol öçen köräşep yatqanda Hamas İzraelgä qarşı suğışqa däwam itäçäk .Yaqın Könçığış frontında tınıçlıq urnaşaçağın kürsätkän işarälär yuq älegä.

färidä xämit, praga
XS
SM
MD
LG