Accessibility links

якшәмбе, 11 декабрь 2016, Казан вакыты 12:57

Qazanğa Çiläbe ölkäse delegatsiäse kilä...


Pänceşämbe könne dä Qazanğa ber törkem qunaqlar kilep töşergä cıyına. Tatarstanda bäyrämnär waqıtında Çiläbe ölkäse könnärenä uza. Şuşı uñaydan 28nçe avgustta Qazanğa Çiläbedän räsmi delegatsiä kilä. Ölkä gubernatorı Petr Sumin citäklägän delegatsiädä Qanun çığaru cıyılışı räise, gubernatornıñ urınbasarları, Çiläbe, Magnitogorsk şähärläreneñ xakimiät başlıqları, ölkäneñ törle sänäğät şirkätläre citäkçeläre, eşmäkärlär bar. Şulay uq Qazanğa Çiläbe ölkäse tatarlarınıñ ictimaği, dini oyışmaları, Bötendönya tatar kongressınıñ cirle bülekçäse wäkilläre dä kiläçäk.

Älege könnär qısalarında Qazan yärminkäsendä qunaqlar tarafınnan kürgäzmä oyıştırılaçaq. Anda çiläbelelär üzlärendä citeşterelgän tawarlar belän tatarstanlılarnı tanıştıraçaq. Xäyer, qunaqlar mädäni ölkädäge qazanışları belän dä maqtanırğa isäplilär. Qazannıñ Kamal isemendäge teatrında Çiläbeneñ däwlät akademiä teatrı çığış yasayaçaq. Çiläbelelärne Tatarstan belän tanışu da kötä. Alarğa respublikanıñ, Qazannıñ tarixi urınnarın kürsätäçäklär, mawıqtırğıç ekskursiälär, qızıqlı oçraşular oyıştıraçaqlar. Şulay uq qunaqlar törle däwlät idäräläre, sänäğät şirkätläre wäkilläre belän dä söyläşülär alıp baraçaqlar. Tatarstan respublikasında Çiläbe ölkäse könnäre qısalarında tağın ber qızıqlı waqiğa bulaçaq. 29nçı avgustta Bötendönya tatar kongressı Başqarma komitetında respublikanıñ Mädäniät häm Mäğärif ministrlıqları belän bergälektä Milli-mädäni säyäsät digän temağa tügäräk östäl ütkäreläçäk. Bu çarada Çiläbe ölkäseneñ räsmi häm ictimaği oyışmaları wäkilläre dä qatnaşaçaq. Anda Rusiädä milli säyäsät mäs’äläläre, ike töbäk arasında milli ölkädäge bağlanışlarnı üsterü yulları, milli mäğärifne häm mädäniätne üsterüdä ictimaği oyışmalarnıñ role, Çiläbe ölkäsendäge tatar xalqınıñ milli-mädäni ixtiacların qänäğätländerü mömkinlekläre tikşereläçäk. Comğa könneñ ikençe yartısında Tatarstan prezidentı Mintimer Şäymiev belän Çiläbe ölkäse gubernatorı Petr Suminnıñ oçraşuı uzaçaq. Ana ike ölkä arasında xezmättäşlek turında memorandumğa qul quyılaçaq, dip kötelä. 30nçı avgust könne isä Çiläbe qunaqları da Respublika könen bäyräm itüdä qatnaşaçaq.



Gölnaz İlgizär

XS
SM
MD
LG