Tatarstanda xristiannarnıñ 150läp prixodı bar. Läkin süz başında uq Anastasiy ataqay prixodlar sanı, çirkäwlär sanına turı kilmäwe, çirkäwlär azraq buluı turında kinayäsen sizderde. Läkin şul kereş süzendä ük Tatarstanda törle konfessiälärneñ tatu yäşäwlären assızıqlap äytte. Xätta, sannarı belän 100 dä tulmağan katoliklarnıñ da ğıybadätxanäse bar häm pravoslavlar alarğa kiräk waqıtta yärdäm itälär. Sorawlar birgändä tağın xramnarnıñ sanı, prixojannar sanı turında süz çıqqaç, Anastasiy ataqay Sovetlar Soyuzı waqıtında Tatarstanda 11 mäçet, 11 çirkäw bulğan dip xäzerge wäzğiätkä, yäğni mäçetlär sanınıñ 100 märtäbä, ä çirkäwlärneñ 10 tapqır ğına artuına işarä yasadı. Älbättä islam ekstremizmı turında da soraw birelde. Anastasiy ataqay-“Terrorizmnıñ islamğa qatnaşı yuq”, dip qırt kiste. Anıñ äytüençä Tatarstanda islam suğışçan tügel. Ä “Kazanskaya boj'ya mater'” ikonasın qaytaru mäs’äläse xaqında - Rus çirkäwe kompetentsiäsendä tügel, bu cirle xakimiät başlanğıçı dielde. Çittän kilgän jurnalistlar soñğı waqıtta Rusiä xakimiäte aldına quyılğan keräşennärne ayırım millät dip tanıtu problemasına da iğtibar itkännär. Qazan häm Tatarstan arxiepiskopı Anastasiy bolay dide.
Audio.Yäğni Rus çirkäwe öçen provaslav din totuçılarnıñ milläte möhim tügel. Tarixta çınnan da keräşennär Rus' xristianlıq qabul itkänçe uk, 9nçı ğasırda uq kreşçenie qabul itkännär digän mäğlümat bar. Keräşennärgä Qazan yeparxiäsendä tatarça ğibädät qılu öçen şartlar tudırılğan. Anastasiy ataqay ütkärgän matbuğat oçraşuınnan soñ jurnalistlar delegatsiäse sinagogağa yunäldelär. Ravvin İtsxak belän oçraşqannan soñ alar möfti Ğosman İsxaqi belän oçraşaçaqlar.
Yunıs Ätnäle.
