Accessibility links

Кайнар хәбәр

Serbiä citäkçlege Kosovo bäysezlegenä qarşı yañadan süz aça


Çärşämbe könne Serbiäneñ säyäsi citäkçelege bäysezlek teläwçe Kosovolılarğa qarşı yañadan süz açıp Kosovonıñ Serbiä eçendä qalaçağın belderde. Kosovolılar monı Belgrad belän Priştina arasında söyläşülär kötelgändä provokatsion adım bularaq bäyäläde.

Serbiä parlamentı da, xökümät başlığı da kiçä Kosovoğa qarşı süz höcüme başladı. Parlament Kosovonı Serbiä suverenlığınıñ häm territorial berbötenlegeneñ ber öleşe dip qarawçı deklaratsiä qabul itte. Räsmi xäbär agentlığı isä premyer ministr Zoran Jivkoviçnıñ Serbiä xärbiläre häm politsiä köçläre ber könne Kosovoğa qaytaçaq digän süzlären tarattı. Mondıy belderüne Kosovodağı alban citäkçeläre dä, häm xätta kürşe däwlätlär dä provokatsion adım dip bäyäli ala. Kosovo premyer ministrı Bayram Räcäpi parlamenttağı deklaratsiä tawışqa quyılğançığa qädär ük anı zur säyäsi provokatsiä dip atadı.

Kosovodağı 2 millionlap keşeneñ 90 protsentın albannar täşkil itä. 1999-nçı yılda biredä serblar belän albannar arasındağı bäreleşlärne NATO bombalawları häm Kosovoğa xalıqara ğäskärlär kertep anda BMO waqıtlı idaräse urnaştıru aşa tuqtatırğa turı kilde.

BMO İminlek Şurasınıñ Kosovodağı waqıtlı idarä turındağı rezolütsiäsendä isä Kosovonıñ bäysezlege tügel, ä Yugoslaviä eçendäge aftonomiä turında ğına äytelä. Ämma Kosovonıñ statusı xäzer bik butalçıq. BMO waqıtlı idaräse betkännän soñ Serbiäneñ bu respublikanı yuğaltuı da mömkin. Xäzer qayber säyäsätçelär kiläçäktä Kosonıñ etnik çiklär buyınça bülenep bäysezlek alu mömkinlege turında da süz alıp bara.

NATO belän yañadan duslaşırğa teläwçe Serbiä premyer ministrı Jivkoviç älegä Kosovoğa serb xärbilären yäki politsiäsen qaytarunı täqdim itmi. Jivkoviç häm Belgradtağı başqa citäkçelek Serbiä häm Çernogoriä armiäse başlığı Branko Krganıñ bu atna başındağı ğäskärlär Kosovoğa qaytarıluğa äzer digän belderüenä bik saq mönäsäbät kürsätte.

Şul uq waqıtta Kosovoda häm Serbiäneñ könyaq öleşlärendä bäreleşlärneñ däwam itüe xalıqta rizasızlıqnıñ artuına säbäp bula ala. NATO häm BMO köçläre toruğa qaramastan bu ayda Kosovoda serblarğa qarşı da, albannarğa qarşı da häm BMO politsiäsenä qarşı da atışlar, şartlatular buldı. Yewropa Berlege uzğan ayda Belgrad belän Priştina arasında söyläşülär ütkärergä täqdim itkän ide. Ämma bu bäreleşlär andıy söyläşülär başlawğa qomaçawlap kilä. Şulay da, Belgradtağı kiçäge qatı belderülärgä qaramastan, Jivkoviç xökümät Kosovo citäkçelege belän aldağı atnalarda söyläşülärgä kereşergä äzer dip belderde.

Naif Aqmal, Praga.
XS
SM
MD
LG