Accessibility links

якшәмбе, 4 декабрь 2016, Казан вакыты 09:20

Tatar däwlät gumanitar institutında rektor saylawları ütte...


Tatar däwlät gumanitar institutı älläni ozın tarixlı bulmasa da, respublika uqu yortları arasında ayırım urında tora. Eş monda älege institutnıñ nibarı 1992nçe yılda ğına eşli başlap, bügenge köndä tatarça sıyfatlı belem birä torğan abruylı uqu yortına äylänüendä genä tügel. Xäzer gumanitar institut isemen yörtkän bu uqu yortı kiläçäktä Tatar milli universitetına äyläner dip kötelä. Şunısın da äytergä kiräk, Milli universitet öçen binanıñ Qazannıñ iñ üzägendä inde nigeze dä salına başladı. Şunıñ öçen dä älege uqu yortı, anıñ eşçänlege belän qızıqsınu zur. İnde äytep kitkänebezçä, pänceşämbe, 28nçe avgust könne, tatar däwlät gumanitar institutında rektornı sayladılar. Älege wazifağa tağın 5 yılğa institutqa 1997nçe yılda rektor bulıp kilgän Wasil Ğäyfullin saylandı. Bu xaqta Gumanitar institutnıñ Ğilmi Şura särkätibe Räysä Xafizova söyli:



Bezneñ institutnıñ Ustavı buyınça rektor 5 yılğa ber saylana. 2003nçe yılnıñ oktäberendä älege rektornıñ mötdäte çığarğa tieş ide. Şuña kürä, 28nçe avgustta institutnıñ uqıtuçıları häm xezmätkärläre cıyılıp otçet tıñladı häm rektornı sayladı. Saylawda qatnaşqan 102 keşedän 101 keşe Wasil Ğäyfullin nämzäten yaqladı, 1 keşe aña qarşı çıqtı.



Şulay itep, kiläse 5 yılda da institutnı pedagogiä fännäre doktorı, professor Wasil Ğäyfullin citäkläyäçäk. Xäyer, bu oçraqta küplärne qızıqsındırğan başqa ber närsä – institut Milli universitet bulıp üzgärtelsä anıñ rektor kem bulır digän soraw älegä cawapsız qala.



Tatar gumanitar institutı turında söylägändä, anıñ tağın ber üzençälegen äytep kitmi bulmıy. Bu uqu yortında çit töbäklärdän kilgän tatarlar uqıy. Monda kürşe Başqortstan, Çuaşstan, Mordoviä respublikalarınnan ğına tügel, Perm, Omski kebek şähärlärdän dä studentlarnı oçratıp bula. Räysä Rawil qızı Xafizova bezgä şuşı xaqta da mäğlümat birde. Ul, şulay uq, çittän kilgän tatar yäşlären uqıtudağı problemalar turında da äytep ütte.



Bezneñ uqu yortında çit töbäklärdän kilgän tatar studentları küp uqıy. Bıyıl da tatarlar küpläp yäşägän Rusiä töbäklärennän yäşlär uqırğa kerde bezgä. Läkin şunısın da äytergä kiräk, alarnıñ tatar telennän belemnäre naçarraq. Şuña kürä kerü imtixannarında da alar tübänräk bilgelär alalar. Läkin bez alarnı studentlarğa kandidatlar itep alabız häm alar annarı matur ğına üzläreneñ uquların däwam itälär. Bezgä şul balalarnıñ beraz belemnären arttırır öçen berär yıllıq östämä kurslar açu mömkinlegen buldırırğa kiräk. Läkin bu östämä çığımnar taläp itä



Gölnaz İlgizär

XS
SM
MD
LG