Qazannıñ Aviatözeleş rayonında 10nçe tatar gimnaziäsendä dä häm 26nçı tatar mäktäbendä dä 1nçe sıynıfqa balalarnı qabul itü tantanaları ütte. Tatar uqu yortlarınıñ töp probleması ata-analarnı balaların şuşı mäktäpkä uqıtırğa öndäw. Bu problema xaqında Qazan şähäreneñ uqıtuçılar konferensiäse barğan waqıtta 26nçe tatar mäktäbe citäkçese Salyaxova Lutsiä Sabir qızı «Azatlıq» radiosı xäbärçesenä äytkän ide: «93nçe yılda bezneñ 5 sıynıf qabul itelä ide, xäzer 1 genä sıynıfqa da balalar cıyu awır. Anda da balalar sanı 20dän artmıy. »
Sentäberneñ 1ndä tatar mäktäbe häm gimnaziälärenä balaların tapşırğan ata-analar ul-qızlarınıñ kiläçäge, yuğarı uqu yortlarına uqıy aluı turında uylağan. Qıyınlıqlar buluı xaqında äytüçe bulsa da, alar barıber narasıyların tuğan teldä uqıtırğa bulğan. Moña härkemneñ üz säbäbe bar. Ata-analrnıñ qaysıları, tuğannarnıñ balaları tatar gimnaziälärendä uquları häm bu uqu yortın saylawı belän qänäğät buluların äytte. İkençe ber ana mäktäp saylağanda balanıñ tuğan telen belüe häm anı onıtmawı turında uylağanın belderde.
Balalarnıñ «Yuğarı belemne dä tuğan teldä alırbız» dip uylarğa tulı nigez bar. Yuğarı uqu yortlarınıñ kübesendä tatarça belem birüçe bülek bar. Şunıñ belän bergä tatar milli universitetnıñ yaña binaların tözü, iskelären tözekländerü bara. Qayber mäğlümatlarğa qarağanda, tatar milli universitet yaqındağı 2-3 yılda açılırğa mömkin. Ömetlär aqlanırmı, yuqmı – kiläçäk kürsäter.
Bikä Timerova
