Accessibility links

Кайнар хәбәр

Bäyrämnärneñ qaysı möhimräk?


Berençe sentäber kalendar' waqiğalarına bay. Berençedän, Bötendönya tınıçlıq köne, şulay uq xärbi bloklarda qatnaşmawçı däwlätlär xäräkäte köne, Amerikada häm Kanadada xezmät köne, Avstraliädä mimoza çäçkäse köne, östäwenä 31 avgust yäğni yäkşämbedä Rusiädä şaxterlar köne buluın häm Qırğızstan, Malayziä illäreneñ milli bäyrämnäre buluın onıtmıyq. Tatarstan qanunnarı buyınça düşämbe könne yal, çönki Respublika könenä turı kilgän şimbä yalı düşämbegä küçerelgän. Barı tik xökümät, prezident apparatları, qayber mäğlümat çaraları, “Azatlıq” radiosınıñ Qazan byurosı häm uqu yortları ğına 1nçe sentäberdä yal itmi.

Belem köne bıyıl da zurlap ütkärelä. Premyer-ministr Röstäm Miñnexanov Bua rayonında mäktäplärdä häm meditsina kolledjında buldı. Prezident apparatı citäkçese Äğzam Ğöbäydullin Älki rayonı uqıtuçıları häm uquçılar tarafına kitte. Başqa citäkçelär häm deputatlar da 1 sentäberdä mäktäp qıñğırawın tıñlıy. İñ zur Belem bäyräme bıyıl Bolaq buyında ütte. Qazan pedagogiä universitetınıñ Mejlauk uramdağı töp binası qarşında irtänge säğät meñlägän keşe cıyılğan ide. Belem könenä bağışlanğan tantanalı mitingqa respublika citäkçeläre, Qazan şähäre häm rayonnarı başlıqları, yuğarı uqu yortlarınıñ rektorları kilde.

Tatarstanda törle däräcädäge uqu yortlarında belem aluçılar häm belem birüçelärneñ sanı millionnan artıp kitä. Yözlärçä meñ pedagoglar, ğalimnär, studentlar, mäktäp uquçıları şuşı könnän başlap, mäğrifät sezonın açıp cibärde. Milli mäğärifneñ mäşäkäte dä, qıyınlıqları da, ähämiäte dä bixisap.

Xäzergä bıyılğı Respublika köneneñ yomğaqları häm üzençälekläre turında mäğlümat tuplanmağan. Bäyrämneñ barışı turında şimbä reportajlarına östäp, tağı şunı äytäbez. Qamal teatrı qarşındağı mäydanda çit il diplomatları, Mäskäw qunaqları belän Mintimer Şäymiev xalıqnı sälämläde. Anda bıyılğı Tuqay büläklärenä layıq bulğan bilgele dirijer Röstäm Abyazovqa häm yazuçı Mösäğit Xäbibullinğa diplomnar häm lawreat medal'läre tapşırıldı. İppodromda iñ berençe urınğa çıqqan caydaq häm at İrkutskidan kilgän ide. Şulay bulğaç, at çabışlarınıñ qimmätle büläge Yıraq Şärıqqa kitte. Biektaw avtodromındağı maşina çabışında premyer-ministr Röstäm Miñnexanov berençe bulıp finişqa kilde genä digändä, anı Almaniädän kilgän sportsmen uzıp kitte häm Tatarstan Prezidentı kubogın Yevropa üzägenä alıp kitte.

Şunı äytergä mömkin - tatar milläten yaqlawçılarnı xurlaw yañalıq tügel.Tuqay äytmeşli, taptasınnar, xurlasınnar, tik canıñ xurlanmasın. Tatarstan, tatar süzläre torğan sayın köçleräk yañğıramasa, millätne degetlärgä, tübänsetergä tezläwçelär yoqlap yuatır ide. Alar da uyana xäzer.

Rimzil Wäli

XS
SM
MD
LG