Germaniädä çığa torğan Özgür politika ( yäğni bäysez säyäsät ) isemle basma, PKK yäki KADEKneñ idarä häyäte äğzası Mustafa Karasuğa tayanıp, atışlarnı tuqtatunı beterü , suğışqa qaytu tügel ä KADEK partizannnarınıñ qatıraq cawap qaytaraçağın añlata dip yaza. PKK partzinnarınıñ 1999nçe yılda citäkçeläre Abdulla Öcalannıñ qulğa alınuınnan soñ ber yaqlı iğlan itkän atışlarnı tuqtatunı Törkiä ber qayçan da qabul itmäde. Karasu süzlärençä, atışlarnı tuqtatunı qabul itmäw yaña köräş başlanaçağın añlata. Suğıştan elek tönyaq Ğıraqnıñ Törkiägä yaqın taulıq regionnarında yäşäwçe 5 meñ körd partizanıñ yuq itü mäsäläsendä Ankara belän Waşington kileşkän ide. AQŞ PKKğa terror oyışması dip qarıy , ämma älege waqıtta Ğıraqnıñ çağıştırmaça tınıç bulğan tönyağı yäğni kördlär yäşägän öleştä Amerika partizannar artınnan çabırğa ber dä cıyınmıy. Törkiä zur cinayät eşlämägän, törek hädäflärenä höcüm oyıştırmağan PKK partizannarı öçen bu cey aylarında öleşçä yarlıqau iğlan itte. PKK amnestie böten suğışçılarğa şulsanda Öcalanğa da qararğa tieş dip öleşçä yarlıqaunı kire qaqtı. Barmaq belän sanarlıq qına körd partizanı - peşmerga Törkiä çigen ütep räsmilärgä birelde. Törkiädä küzätüçelär Amerika Ğıraqtağı kördlärgä basımnı arttırsa ğına yarlıqaunıñ näticäse kürener ide dip söyli .Xäterli torğansızdır, PKK nıñ Törkiäneñ könyaq könçığışında başlıça kördlär yäşägän töbäktä başlatqan bäysezlek kampanyası 30meñnän artıq keşeneñ häläk buluına kiterde.Ankara PKK yuq itelgänçe suğış däwam itäçäk dip , atışlarnı tuqtatunı kire qağa. Anıñ partizannar artınnan yöregän ber niçä meñ soldatı tönyaq Ğıraqta tora.AQŞnıñ Ğıraqnı okupatsiäläwe Törkiäneñ partizannnar awın çikläde. Tönyaq Ğıraqta bäysez körd däwläteneñ oyışuı Ankara öçen albastı bulıp tora. Törkiä üzendäge kördlärne räsmi räweştä azçılıq dip tanırğa telämi, ämma Yevropa Berlegenä kerü omtılışı säbäple ul qayber reformalar ütkärergä şulsanda kördlärgä dä ana telendä tapşırular yasau, ana telendä mäktäplär, kurslar oyıştıru kebek xoquqlar tanıdı. Premier Erdoğan berlek mäsäläsendä bugen Berlindä kansler Schröder belän söyläşülär alıp bardı. Ämma älege mizgelde Erdoğan xökümäte öçen töp mäsälä, AQŞ sorağan xärbilärne Ğıraqqa cibärergäme, yuqmı. Ankaranıñ kiläçäktä yaqın könçığıştağı geopolitik role qurqınıç astında . Ankara AQŞ belän mönäsbätlären saqlap qalu häm iqtisadına bik kiräk bulğan yardämne alu öçen ğäskär cibärergä tieşlegen belä. Amerika armiäseneñ Yevropa köçläre öçen cawaplı komandirı vä NATOnıñ başkomandirı general James Jones bugen Ankarağa kilde. İrtägä başlanaçaq söyläşülärdä Törkie diplomatik çığanaqları Jonsqa tönyaq Ğıraqtağı körd törkemnäre PKK belän yaqın elemtädä tora häm bu Ankaranı nıq borçıy dip belderäçäklär . Törkiädän 10-12meñ ğäskär sorağan AQŞ generale älbättä buş qullar belän Ankarağa kilmäde. Ul KADEK-PKK mäsäläsendä töreklärne tınıçladıraçaq çaralar belän kilde dip törek analitikları söyläsä dä törek xärbiläreneñ tönyaq Ğıraqta urnaşa almıyaçağın Waşington añlarğa birgän ide
färidä xämit,praga
färidä xämit,praga