Accessibility links

шимбә, 3 декабрь 2016, Казан вакыты 01:30

Minem militsiä mine saqlıy...


Minem militsiä mine saqlıy digän äytem hämmägezgä dä tanıştır, xörmätle tıñlawçılar. Bilgele bulğança, militsiä grajdannarnıñ häm alarnıñ şäxsi mileklären saqlaw öçen eşli. Ämma, qayçaqlarda bu tabiği bulıp kürengän äytem, çınbarlıqqa turı kilmäskä dä mömkin ikän. Mäsälän, küptän tügel Qazan şähäreneñ Sovet rayonında militsiä xezmätkärläre Viktor Litvin isemle eşmäkär arendağa alğan binanı üz qullarına töşergännär. Näticädä Tatarstannıñ prokuraturası Sovet rayonınıñ militsiä bülege başlığı Fayaz Şabaevqa häm rayon transport inspeksiäse başlığı Sergey Lavrovqa qarşı cinäyät eşen quzğatqannar. İkese dä üz wazifalarınnan tış wäkälätlär qullanuda, urısça “prevıyşenie polnomoçiy”da, gäyeplänälär.

Älege tarix bıyılnıñ aprel' ayında başlana. Qazanda yäşäwçe Viktor Litvin Qazan kommunal' milke belän idärä itü komitetı oyıştırğan auksionda kibet açu öçen Ğubkina uramındağı elekke diskoklub binasın arendağa alğan. Anda tözätü eşläre başlanğaç, 19nçı yün könne berniçä militsiä xezmätkäre binanı urap ala häm Sovet rayonınıñ ĞAİ başlığı Sergey Lavrov binanıñ xucasına, tözätü belän şöğillängän eşçelärgä eşne taşlap kitärgä boyırıq birä. Ul bu boyırıqnı bu binada däwlät avtoinspeksiäneñ idäräse bulaçağı belän añlata.

Ber kön ütkäç, 20nçe yün könne, eşmäkär Litvinnı tağın ber tapqır kürgändä, şul uq ĞAİ başlığı anı qinıy. Qinalğan eşmäkär tabiblardan tieşle spravkalarnı cıyıp, Sovet rayonınıñ mäxkämäsenä möräcäğät itkäç, mäxkämä militsiä xezmätkärläreneñ ğämällären qanunsız dip taba. Ämma, şul uq rayonnıñ prokuraturası kiresençä uylap, Respublika Yuğarı Mäxkämäsenä şiqäyät yullarğa äzerlängändä, Tatarstan prokuraturası üz tikşerüen ütkärä. Tikşerü şunı açıqlıy. Sovet rayonınıñ başlığı Al'bert Kamaleyev bäxäs tudırğan binanı rayon militsiäse başlığı Fayaz Şabayevqa alırğa röxsät itkän häm Şabayev rayonnıñ ĞAİ başlığı Sergey Lavrovqa bu milekne qulğa alırğa quşqan. Ämma, monı dällillägän dokumentlar bulmaw säbäple, tikşerüçelär bik qızıqlı wäzğiätkä yulıqqannar. Eşmäkär Viktor Litvinnıñ advokatı söyli, ul tabiği säbäplärdän üz isemen äytmäwne soradı.

Tasma

Şulay itep, militsiä başlıqlarınıñ Ğubkin uramındağı binanı alığız digän käğäze yuq. Xäyer, ul bula da almıy, çönki qanun buyınça, Sovet rayonı administratsiäseneñ kommunal' milektä bulğan binalarnı birü mömkinlege yuq. Monıñ öçen şähärneñ KUKİ isemle, kommunal' milek belän idärä itü komissiäse oyıştırılğan.

Tasma

Şulay itep, Tatarstan prokuraturası quzğatqan cinäyät eşe bik faydalı misal bulıp çığa. Ber yaqtan ul xalıqnı üz xoquqların qurıqmıyça yaqlarğa öyrätsä, ikençe yaqtan ul militsiä başlıqlarına milek mäs`älälärendä qanunğa nigezlänep eşlärgä kiräklegen kürsätä.

İskändär Nurmi, Qazan

XS
SM
MD
LG