Accessibility links

пәнҗешәмбе, 8 декабрь 2016, Казан вакыты 01:14

Tatarstanda yaña mäktäplär sanı arta…


Bıyıl Tatarstanda 1nçe sentäber – Belem bäyrämen zurlap bilgeläp üttelär. Respublika citäkçelege qatnaşlığında şaqtıy yaña binalar açıldı, küp büläklär tapşırıldı, matur qotlaw süzläre häm räxmätlär äytelde. Bäyräm könne Rusiäneñ Mäğärif ministrı Vladimir Filippovnıñ üzeneñ kollegası – Faris Fäxrazov isemenä cibärgän qotlaw xatı da dönya kürde. Anda ministr respublikanıñ mäğärif xezmätkärlären, uquçılarnı, ata-analarnı yaña uqu yılı başlanu uñayınnan täbriklägän häm Rusiäneñ yaqtı kiläçäge xaqına bergäläp uñışlı ğına eşlärgä çaqırğan. Xäyer, Belem köne uñayınnan tantanalar, bäyräm itülär äle 2nçe sentäber könne dä däwam itte. Mäsälän, Aqsubayda respublika prezidentı Mintimer Şäymiev qatnaşlığında yaña mäktäp açıldı. Neftyaniklar yärdämendä safqa bastırılğan älege mäktäp 500 balağa isäplängän. Uqu yortın cihazlawnı da neftyaniklar üz östenä alğannar. Prezident ta qunaqqa buş qul belän kilmäde. Ul Aqsubaynıñ yaña mäktäbenä kompyuter klassı büläk itte. Sişämbe könne şundıy uq tantanalı çaralar Tatarstannıñ Laeş häm Älki rayonnarında da ütte. Alarda da zur qunaqlar qatnaştı, matur büläklär tapşırıldı. Äytergä kiräk, waqıtlar awır, iqtisadi mömkinçeleklär çikle buluğa da qaramastan, Tatarstanda mäğärif ölkäsen onıtmıylar. Äle küptän tügel genä respublika mäktäplärenä buşlay kompyuterlar tarattılar, alarnı İnternetqa totaştırdılar. Uqıtuçılarnıñ xezmät xaqın tüläw dä xökümätneñ daimi kontrole astında tora. Tatarstanda yuğarı uqu yortları da tözekländerelä, yaña mäktäplär dä şaqtıy tözelä. Mäğärif ministrı Faris Fäxrazov süzlärenä qarağanda, Tatarstan yaña açıla torğan mäktäplär sanı buyınça Mäskäw şähärennän qala Rusiädä ikençe urında tora ikän.

Ä inde bäyräm çaraların düşämbe könne ük tämamlağan uqu yortları 2nçe sentäberdä uquğa kereştelär. 2003-2004nçe uqu yılında Tatarstanda 2 meñ yarımnan artıq mäktäp eşläyäçäk. Alarda 500 meñnän artıq bala belem alaçaq. Rusiä Mäğärif ministrlığı mäğlümatlarına qarağanda, ildä 100dän artıq mäktäp 1nçe sentäberdän açılmağan, çönki alar balalarnı uqıtırlıq xäldä tügel. Respublika mäktäplärendä bu mäs’älädä xällär niçek tora soñ? Bezdä dä andıy mäktäplär barmı? Şuşı sorawlarnı bez Tatarstannıñ Mäğärif ministrlığına yulladıq. Anda bezgä, respublikada ber genä mäktäp tä üz eşen başlamıy qalmadı, 1nçe sentäberdän barısı da balalarnı qabul itte, dip belderdelär. Xäyer, yanğın sünderüçelär ütkärgän tikşerülär respublika mäktäplärendä yanğınğa qarşı qurqınıçsızlıq ölkäsendä eşlärneñ şäptän bulmağanın kürsätkän. Bu xaqta sişämbe könne ütkän mäğlümat oçraşuında yanğın sünderü bülekçäse citäkçese Aleksandr Kuropyatnik äytte. Elek bu eşkä älläni iğtibar itelmi ide, xäzer isä, Rusiä mäktäplärendä bulğan berniçä qotoçqıç faciğädän soñ, yanğınğa qarşı qurqınıçsızlıqnı tä’min itü ölkäsendä uñay yaqqa üzgäreşlär sizelä başladı. Bıyıl, mäsälän, mäktäplärgä şuşı eşkä 11 million sum aqça bülenep birelde. Bıltırğa qarağanda, bu 3 million sumğa kübräk. Läkin yıllar buyı älläni qaralmağan mäktäplär öçen bu aqçalar ğına citärlek tügel ikän. Aleksandr Kuropyatnik süzlärenä qarağanda, finanslanu şuşı külämdä genä saqlansa, Tatarstan mäktäpläreneñ yanğınğa qarşı qurqınıçsızlığı 10 yıldan soñ ğına rätlänäçäk.



Gölnaz İlgizär

XS
SM
MD
LG