Accessibility links

Кайнар хәбәр

Sverdlov ölkäsendä yaña tatar mäktäbenä nigez taşı salındı


Yaña uqu yılı başlanır aldınnan Sverdlov ölkäse mäğärif üsterü institutında tatar, başqort häm mari telläre uqıtuçıları öçen kompyuter üzläşterü kurslarınıñ ikençe etabı eşe tämamlandı. Bu kurslar uqıtuçılar öçen buşlay. Ölkäneñ iñ yıraq poçmaqlarında urnaşqan awıllardan biregä alar bik teläp kilälär. Tuğan tel däreslären yaña ısullar belän alıp baru, internettan alınğan metodik äsbaplar, kürsätmälär qullanu mömkinçelege alarnı bik quandıra. Ämma awıllarda elemtä çaralarınıñ citärlek däräcädä yaxşı sıyfatta bulmawı arqasında internet kebek zamança alımnarnı qullanu älegä tizräk çişäse mä’sälälärneñ berse bulıp tora. Sverdlov ölkäsendä tatar, başqort, mari telläre uqıtuçıları öçen iğlan itelgän “yıl uqıtuçısı” dip atalğan bäyge däwam itä. Anıñ näticäläre oktäber ayında, uqıtuçılar köne bäyräme aldınnan yasalaçaq. Ölkäneñ mäğärif üsterü institutı metodistı Zäytünä Şäymöxämmätowa äytüençä, bäyge näticäläre tuğan tel uqıtuçılarınıñ kategoriälären kütärep, alarnıñ xezmät xaqın arttıruda ber etärgeç bulaçaq. Zäytünä xanım bu aralarda ciñep çıqqan uqıtuçılar öçen büläklär äzerlärgä sponsorlar ezli. Anıñ äytüençä, ingliz, fransuz, nemes telläre uqıtuçıları öçen ütkärelgän mondıy bäygelärdä qatnaşuçılarnı Amerika, Fransiä, Germaniä kebek illärneñ ilçelekläre iğtibarsız qaldırmıylar ikän. Tuğan telne öyrätüçe uqıtuçılarnı da qızıqsındıru çaraların tabu bik kiräkle eş bulır ide, dip sanıy Zäytünä Şäymöxämmätowa. Küptän tügel Sverdlov ölkäse, Tübän Sirgä rayonınıñ Ufa Şiğere awılında küptän kötelgän waqiğa bulıp uzdı: Sverdlov ölkä xökümäte räise Aleksey Vorob'yev qatnaşında yaña salınaçaq mäktäp nigezenä berençe taş salındı. Xökümät wäkillären awıl xalqı bäyrämçä kienep, ipi-toz, yaktı yöz belän qarşı aldı. Awılnıñ aqsaqalları isemennän Nurislam xäzrät tözeleşne başlap cibärü öçen xäyer-fatixa birep doğa qıldı, milli kiemnärdän kiengän sılu qızlar qunaqlarnı çäk-çäk belän sıyladılar, milli moñnar yañğıradı, böten cirdä bäyräm ruxı sizelep tordı. Aleksey Petroviç tözüçelär häm rayon xakimiäte aldına yaña mäktäp tözeleşen sentäber ayında başlap cibärergä, qar yauğançı nigezne salıp beterergä digän mäs'älä quydı. Ölkä xökümäte üz çiratında kiräk külämdä raslanğan aqçanı waqıtında birep baraçaq, dide ul. Fäwiä Safiullina, Yekaterinbur.
XS
SM
MD
LG