Bu könnärdä Yekaterinburg şähäreneñ Estrada teatrı zalında ğädäti bulmağan waqiğa bulıp uzdı: Sverdlov ölkäse tarixında berençe tapqır “Başqort güzäle” dip atalğan konkurs oyıştırıldı. Konkursnı Başqortstan respublikasınıñ Sverdlov ölkäsendäge daimi wäkillege oyıştırdı. 20 qız bala säxnädä çibärlektä, uñğanlıqta, tapqırlıqta köç sınaştı.
Äytergä kiräk, Başqortstannıñ daimi wäkillege bu bäyrämgä bik nıqlap häm centekläp äzerlängän. Yäş kenä buluına qaramastan, çibärlege, sılulığı, uñğanlığı belän genä tügel, küpqırlı säläte belän tanılğan rässam-modelyer, Sverdlovski yuridik akademiä studentı Valeriä Tümenseva başınnan axırına qädär bäyrämne üze äzerlägän. Qatnaşuçılarnı saylap aludan başlap, senariy tözü, tamaşanı säxnägä quyu, dizayn, küpsanlı repetitsiälär, sponsorlar belän eşläw – bar da Valeriä östendä bulğan.
Bäyrämne Valeriä üze häm Zahir Şäyäxmätov açıp cibärdelär. Zäweq belän, matur itep tegelgän başqort milli kiemnäre qızlarnıñ barısına da bik kileşep tora, säxnägä kümäk çığış, başqort biüläre bik osta başqarıldı, nıqlı äzerlek kürenep tora ide. Monnan tış, biredä Valeriä Tümensevanıñ “Qoyaşlı Başqortstanım” häm “Almazlı tönnär” dip atalğan eksklüziv kiemnär modelläre kolleksiäse kürgäzmäse dä buldı. Bäygedä qatnaşuçı qızlar, bu modellärne kürsätkändä oyalçan da, çayan da, sılu da başqort qızı obrazın bik açıq surätli aldılar. Jüri iğtibarına şulay uq alar üzläre äzerlägän başqort milli rizıqları da täqdim itelde.
Qızlar çirattağı bäygedä qatnaşuğa äzerlängän waqıtta tamaşaçılar matur itep qurayda uynawı, därtle biüläre, moñlı cırları belän dan totqan säxnä ostası Zahir Şäyäxmätov häm cırçı Vener Kamalov çığışların qarap küñel açtılar.
Bäygedä cide nominatsiä bilgelängän ide. Berençe öç urınnan qala, tamaşaçılarnıñ küñelenä xuş kilgän qızğa da, iñ näfis, iñ sılu qızğa da, eşlekle sıyfatları belän ayırılıp torğan qızğa da ayıruça zur iğtibar birelde. Monnan tış, “Başqortstan qızı” dip atalğan ayırım nominatsiä dä bar ide. Ul isemne Başqortstannan kilgän Läysän Miftaxova yawlap aldı.
Berençe başqort güzäle itep bertawıştan ozın qara çäçle, nurlı yözle Yekaterinbur qızı Aygöl Xäyretdinovanı sayladılar. Aygölgä unbiş yäş. Ul Dyagilev isemendäge litseyda belem ala. Litseyda iñ yaxşı uquçılarnıñ berse bulıp sanala. Qıznıñ talantı küpqırlı. Ul bik matur, küñellärgä ütep kererlek itep fortepyanoda uynıy, bik osta rässam, räsem yasaw buyınça törle däräcädäge bäygelärdä ciñep çıqqan keşe.
Berençe başqort güzälen zal ayağürä basıp sälämläde. Ciñep çığuçılarğa küpsanlı sponsorlardan bik bay büläklär äzerlängän ide. Büläklär arasında näfis mexlı tun da, televizor, videomagnitofon, muzıykal' sentr, kesä telefonı häm başqa qimmätle äyberlär küp ide.
Kütärenke küñel, köläç yözlär, köçle alqışlar bäyrämne tağın da bizäde. Älege kiçä çın yäşlek, güzällek bäyrämenä äwerelde.
Fäwiä Safiullina, Yekaterinbur.
Fäwiä Safiullina, Yekaterinbur.
