Accessibility links

җомга, 9 декабрь 2016, Казан вакыты 22:19

Mäğlümat urınınä säyäsät…


Soñğı waqıtta, bigräk tä Tatarstan Respublikası bäyrämnäre könnärendä Rusiänen üzäk mäğlümat çaralarınıñ telsez-çuqraq häm suqır qaluına ğäcäplängän idek. Alay tugel ikän. Menä "Российская газета"nıñ 3nçe sintäber sanında Yekaterinä Dobrıninanıñ zur gına mäqäläse çıqqan. Ul "Qazan Kremle" dip atala. Närsä turında söylı Respublika köne aldınnan Basket-xollnıñ açıluı, Rusiänen sport ministrı Fetisovnıñ şuşı sport sarayın maqtawı, Tatarstan Deklaratsiäsen qabul itkännän soñ bulğan bäxäslär, Rusiä Konstitutsion mäxkämäseneñ Tatarstan häm başqa respublikalarnıñ qanunnarında suverenitet digän süzne yuqqa çığaruı, Qazannıñ başbaştaqlanıp, Mäskäwdän dä ölkän 1000-yıllıq şähär bulırğa tırışıp, yubileyğa äzerlänüe, bıyılğı bäyräm aldınnan Şäymievnıñ çit il jurnalistları belän oçraşuı, Qazan başlığı Kamil Isxakovnıñ press-konferensiäse, ippodromda at çabışları waqıtında kem atınıñ berençe kilüe häm nicä täñkälek büläk tapşıruı, soñğı faktqa keçkenä genä tözätmä kertergä kiräk bulır, "Altın daga" at cabışınıñ prizlıq fondı gazetada yazılğança, 3 million dollar tügel, 3 million sum.

Barıber zur aqça, älbättä. Häm bu aqça bäygedä ciñgän Irkutski atı xucasına kitte. Şulay itep, dollar belän Rossiä rublen butağan Dobrıninä mäqäläsendä bäyräm kokteyle, yäğni säyäsi vinegret täqdim itelä. Mäqälä başı astındağı anons bik uzençälekle: "Mintimer Şäymiev yaña grandioz tamaşada töp rol'ne uynarğa äzerlänä." Ğadi, yäğni döresen söyläwçe primitiv jurnalist bulsa, ul Tatarstan Respublikası köne şäp yäki sülpän utte, fälän-fälän çaralar buldı, xättä Rusiä prezidentı tatarlarnı maqtap, bäyräm belän qotladı, dip yazar ide. Nibarı 10-15 gäzit yulı, şırpı qabı mäydanı qädär gäzet baganası citär ide.Yuq bit, bulmadı ul xäbär. Bik telägän keşe dä Tatarstanda nindi xällär bulıp yatqanın belä almadı. Xäyer, tatarlarnıñ nindider şikle eş belän şogellängänen yoräge belän sizgän keşelär bardır. Menä şundıy ul, xäzerge mäğlümat sugışınıñ räweşe. Xaqiqätne yäşerü, şik cibärü, mäğlümatnı taratmaw. Yäki bulgän mäğlümatnıñ ayırım ber mäğnäsen genä küpertü.

www.strana.ru Internet säxifäseneñ 1nçe sintäber sanındağı mäqälä bolay dip atala. "Mintimer Şäymiev: bez böten Rusiänen Mäkkäse bulırgä tırışmıybız." Imeşter, Tatarstan prezidentı şulay dip äytkän. Äytkänder inde bälki, läkin nindi kontekstta häm nindi suz belän citkergänder, anısı bezgä qarañğı. Näticäse ber genä. Mintimer Şäymievnen kostyum toymäsennän totıp, soraw biräse kilä. "Nüjäli, Prezident-agay, Tatarstannı tatar milläte märkäze, iñ aldınğı tobäk, Yevropa däräcäsendäge region itü niätennän baş tarttıñ?" Çärşämbe könne prezidentnıñ yärdämçelärennän älege Mäkkä turındağı xäbärne raslawnı yäki inqär itüne sorasaq ta, cawap alıp bulmadı. Bäyräm aldınnan zur törkem jurnalistlar Qazanda qunaqta bulğan idelär. Kollegalarıbız Mäskäwgä qaytıp, tämam aynıp, yal itkäç, yazırga utırgannar. Yaza belälär, tik mäğlümat birergä, döreslekne taratırga telämilär. Yaramıy torgandır. Ämma wallahi-billähi, Tatarstan prezidentın ber oçratıp, Tatarstannıñ kemneñ Mäkkäse buluı turında sorayacaqbız.

Rimzil Wäli

XS
SM
MD
LG