Accessibility links

шимбә, 3 декабрь 2016, Казан вакыты 05:39

Amerikannarnıñ BMO İminlek Şurasına täqdim itkän Ğiraq qararı


Waşington Ğiraqqa finans yardämne häm üzeneñ andağı xärbi çığımnarın qaplawnı arttırunı ğına tügel, ä Ğiraqnı torğızu, anda iminlek urnaştıru eşenä inde Berläşkän Millätlär Oyışmasın cälep itüne dä alğa sörä. Bu uñaydan amerikan yağı İminlek Şurası öçen maxsus qarar ölgesen äzerläde.

Quşma Ştatlar äzerlägän qarar ölgesen İminlek Şurası utırışlarında äle törle şomartular, yazılış räweşen üzgärtülär kötsä dä, amerikannarnıñ Berläşkän Millätlärne ni däräcädä qatnaştırırğa teläwen inde xäzerdän ük abaylap bula. Şulay itep, Waşington fikerençä, İminlek Şurası tübändäge çaralarğa fatixa birä ala: berençedän, Ğiraqta iminlek wä totrıqlılıq urnaştıru maqsatında anda urtaq citäkçelektä xalıqara tınıçlıq saqlaw köçlären urnaştıru. Xärbi citäkçelek şulay da Quşma Ştatlar qulında qalırğa tieş. İkençedän, Ğiraqnıñ idarä şurasın ildäge waqıtlı xakimiat nigezen täşkil itüwen tanu. Yäğni amerikannar, üzläre qorğan şul şuranıñ räsmi töstä Berläşkän Millätlär tarafınnan räsmän tanıluwın teli. Öçençedän alar İminlek Şurasınıñ Ğiraq idarä şurasın, Quşma Ştatlar citäklägän tınıçlıq köçläre häm Berläşkän Millätlär wäkile belän bergä ilneñ yaña konstitutsiäsen buldıru häm irekle saylawlar äzerläw eşenä çaqıruwın alğa sörä. Dürtençedän, BMO general'' sekretare Kofi Annannı, Ğiraq idarä şurası möräcäğät itkän oçraqta aña saylaw äzerleklären alıp baru öçen Berlşkän Millätlärneñ mömkinleklärennän faydalanunı röxsät itüne ütenü. Waşington äzerlägän qarar ölgesendäge bişençe matdä, İminlek Şurasınıñ, Berläşkän Millätlär Ğiraqta, bigräk tä humanitar eşlärdä, iqtisadi tözekländerüdä häm däwläti wä cirle xakimiat buwınnarın torğızuda xälitkeç rol'' uynıy digän elekke qararların yañadan ber raslaw. Altınçıdan, başqa illärne Ğiraq politsiäsen äzerläw häm anı tieşle däräcädä cihazlaw eşenä quşıluğa öndäw. Cidençedän, Berläşkän Millätlärneñ äğza illären Ğiraqnı torğızu häm tözekländerügä kiräk bulğan çaralar belän tä''min itärgä çaqıru. Häm nihayät, Amerika Quşma Ştatların Ğiraqtağı xalıqara tınıçlıq köçläre isemennän İminlek Şurasına kiräk çaqlarda, läkin kimendä altı ayğa ber märtäbä xisap birep torunı ütenü. Waşingtonnıñ Berläşkän Millätlärdäge İminlek Şurası öçen äzerlägän maxsus Ğiraq qararı ölgesendä menä şundıy maddälär bar. Anıñ eşçe tekstı inde Şuranıñ 15 äğza ilenä taratıla başladı, aldağı könnärdä anı tikşerü häm qabul itügä äzerläw alıp barılaçaq.

Kärim Kamal, Praga
XS
SM
MD
LG