Accessibility links

пәнҗешәмбе, 8 декабрь 2016, Казан вакыты 17:29

Keräşen tatarları yañadan millät bulırğa teli...


«Московские новости» gäzitendä çıqqan mäqälä änä şulay atala ide. Xäbärçe Rostislav Vilegcanin, Qazanğa Rusiä häm çit il jurnalistları törkeme belän bergä kilgän ide. İnde xäzer şuşı törkemdä bulğan jurnalistlarnıñ kübese, başqa küp sanlı temalarnı çittä qaldırıp, ber uq keräşen mäs’äläsen quyırta.

« Московские новости » gäzite xäbärçese başta uquçılarnı Tatarstan Prezidentın keräşennärneñ ayırılıp çığu mäs’äläsenä mönäsäbäte belän tanıştıra häm şunda uq qarşı yaqqa da süz birä. Mäsälän keräşen regionara berlegeneñ Mendeleyevskiy bülekçäse citäkçese İgor’ Utkin Mäskäw gäzite xäbärçesenä tübändägelärne beldergän:

«Keräşen tatarların Tatarstanda ezärleklilär, üz dinebezne totarğa qomaçawlılar, keräşen telendä doğa qılu öçen Tatarstanda 1genä çirkäwdä mömkinlek bar...».

Qazanğa kilgän jurnalistlar törkemendä «REN-TV» kanalnıñ xäbärçese dä bulğan ikän. 3nçe sintäber kiçendä älege kanalnıñ yañalıqlar xezmäte dä keräşennärneñ tatar millätennän ayırılıp çığarğa teläge häm alarnıñ Tatarstanda cäberlänüe turında xäbärne tapşırdı. REN-TV anda «Tatarstan xakimiätläre alarğa basıym yasıy, häm ayırım millätkä bülenep çığarğa mömkinlek birmi», digän näticä yasap quydı.

Barlıq xäbärçelär dä bu ayırılıp çığu ğälämätläre artında ber uq maqsatnı kürä – Yäğni keräşennärneñ sanın ğomum tatarlar sanınnan alsaq, Tatarstanda tatarlar küpçelekne täşkil itmäyäçäk, häm bu Tatarstanda milli häm dini xälneñ kisken üzgärüenä kiterergä mömkin ikän.

Läkin şunısı qızıq qayber mäğlümat çaraları bu säbäpne Tatarstan xakimiätläreneñ ni säbäple qarşı çıqqanın añlatu öçen kitersä. Başqa jurnalistlar – şul dälilne ni säbäple keräşennär ayırılıp çığarğa telägänen kürsäter öçen qullana. Bu şartlarda çın döresen äytep birü awır. Tatarstanda da keräşennärneñ xatlarına mönäsäbät kürsätüçelär buldı. Küptän tügel «İnterfax» agentlığı Rafail Xakimovnıñ fikeren bastırıp çığardı. Anda ul «Keräşennär barı tik başqa din totuçı tatarlar ğına. Din – millätne bilgeläwçe faktor tügel», dip mönäsäbäten beldergän ide Tatarstan Prezidentınıñ säyäsi kiñäşçese. Şulay uq «Tatarstan yäşläre» gäzitendä Semberdä yäşäwçe millättäşebezneñ keräşen eşenä qarata külämle mäqäläse basılıp çıqtı. Anda ul «keräşennärdän ayırım xalıq yasarğa omtılu – barı tik tatarnı tämam yuq itü çarası», digän fiker äytä.

Äytkänebezçä, keräşen tatarları arasında da başqa fikerdä toruçılar da bar. Qazan keräşen oyışması wäkile Nikolay Maksimov mäsälän şundıylardan. Yaqın könnärdä anıñ fikerläre «Azatlıq» radiosınıñ dulqınnarda yañğırar. Bezneñ belän bulığız.

Bikä Timerova.

XS
SM
MD
LG