Accessibility links

якшәмбе, 4 декабрь 2016, Казан вакыты 11:09

Amerika tatar awılı belän qızıqsınırmı?


Amerika Quşma ştatları tarafınnan ütkärelä torğan törle bäygelärdä, uqu programmalarında tatarstanlılar bik aktiv qatnaşa. Alar arasında studentlar yäki ğalimnär genä tügel, ä törle hönär wäkilläre bar. Bügen bez sezne şundıy keşelärneñ berse – Qazanda eşläwçe İdel turistik firmasınıñ citäkçese – Färidä xanım Ğataullina belän tanıştırıp kitäbez. Şunısın da äytergä kiräk, anı küplär İdel firması şöğellänä torğan ber tarmaqtan – İdel-Xac programmasınıñ eşçänlegennän belälär. Quşma ştatlarğa cıyınuçı Färidä xanım İdel firması turında menä närsälär äytte.



İdel firması 2001nçe yılda oyıştı. Bezneñ firmanıñ İdel-Xac bülegeneñ eşçänlege nigezendä yıl sayın 100dän artıq tatarstanlılar Xacğa baralar. Ä İdel firması üze törle turistik programmalar oyıştıra. Şularnıñ iñ qızıqlılarınıñ berse – Awıl programması. Anıñ qısalarında bez qunaqlarıbıznı ber köngä tatar awılına alıp barabız. Anda alarğa tatar aşların aşatalar, munça kertälär, cırlatalar, bietälär, tatar aşların peşerergä öyrätälär. Şulay uq turistlar tatar awılınıñ matur tabiğäte belän dä xozurlana alalar. Programmada xätta auğa baru da qaralğan.



İdel firması ğadi turizm belän genä tügel, ä anıñ etnik yünäleşe belän şöğellänä. Xäzer inde çit illärdän kilüçelärgä genä tügel, ä xätta respublikanıñ zur şähärlärendä yäşäwçelärgä dä qızıqlı bulğan tatar awılına säyäxätneñ şiğäre bulıp Ğabdulla Tuqaynıñ Näq Qazan artında bardır ber awıl digän yulları tora. Üzeneñ Amerikağa säfärendä Färidä Ğataullina andağı millättäşlärebez belän oçraşıp, üzläreneñ şuşı mawıqtırğıç programmaları turında da söylärgä niätli ikän. Xäyer, anıñ säyäxäteneñ töp maqsatı bu tügel. Färidä xanım Quşma ştatlarğa grajdannar initsiativası üzäge çaqıruı buyınça bara. Anda ul Amerikanıñ aldınğı turistik firmaları wäkilläre belän oçraşıp, alarnıñ eşläw ısulları belän tanışaçaq, Könyaq Oregon universitetında leksiälär tıñlayaçaq, praktik däreslärdä qatnaşaçaq. Şulay uq ul Amerikanıñ turistik firmaları arasında üzläre belän eş alıp barırlıq partnerlarnı da tabırğa niätlänä.

Gölnaz İlgizär

XS
SM
MD
LG