Ğıraqta totrılılıq buldıra almağan Bush administratsiäse yañadan BMOna qaytıp Ğıraqta xalıqara köçlär urnaştıru häm ütkän ayda üze saylap utırtqan 25keşelek Ğıraq idarä şurasın legitimlaştırğan rezolutsiä qabul itelüen teli.
Atnakiçtä Dresden şährendä ütkän franko-german summitında prezident J.Chiraq belän kansler G.Schröder jurnalistlarğa Waşingtonnıñ Ğıraqta BMO belän eşlärgä teläwe döres yünäleştä atlanğan adım ämma bu inisiativa bezneñ qaraşıbızça citärlek tügel dip äytkän. Chiraq,mömkin bulğan qädär tizlektä aftoritetnı Ğıraq xökümätenä tapşıru bulğan prinsıp mäqsattan bu resolutsiä proyektı şaqtıy yıraqta dip söyläde.Schröder Chiraq belän tulısınça kileşep Parij belän Berlin amerikannar qulında bulğan Ğıraqnı tözekländerü eşe ğıraqlılarğa birelergä tieş digän qaraşta dip äytep tağı bolay dide(audio)
Suğışnı aqlau häm suğışqa qarata pozitsiän nindi genä bulmasın , äle Ğıraqqa demokratiä häm stabillıq turında perspektiva birü waqıtı. Äle anıñ kiläçäge turında uylau waqıtı. Politik protsess häm bigräk tä Ğıraq xökümäten uñışlı räweştä eş başına kiterü öçen cawaplılıqnı BMO üz östenä alsa ğına andıy perspektiva ğämälgä aşırıla ala.
AQŞ täqdim itkän rezolutsiä proyektı , kübräk illärneñ Ğıraqqa xärbilär cibärü şulayuq tözekländerü eşenä kübräk aqça birülären mäqsat itep quysa da ,Waşingtonnıñ Ğıraqta östenlek itkän rolen saqlap qala , tik anda xalıqara köçlär belän citäkçelek itkän AQŞ xärbiläre İminlek Şurasına xisap birer digän taşlama bar. AQŞ belän suğıştan elek bulğan nizaqnıñ täqrarlanmawı öçen bulsa kiräk Fransiä belän Germaniä bu yaña inisiativanı tikşerergä , täqdimnär yasarğa äzer buluların da äytte. Bugen Pragqa kilgän kansler Schröder, rezolutsiäne nindider aktivlıq dip bäyäläp bolay dide ( audio) bez suğış nindi genä säbäplärdän başlanğan bulmasın, xäzer Ğıraq xalqı häm böten töbäk öçen demokratik, totrıqlı däwlät buldıru öçen eşlärgä tieşlegebez turında kiläşäbez.Bez eşliäçäkbez,rezolutsiägä kilgändä nindider aktivlıq buluın iqrar itärgä kiräk. Ämma rezolutsiä praktikada närsä añlata bu turıda İminlek Şurası qarar birergä tieş.
Rezolutsiä proyektınıñ inisiatorı dip uylanğan däwlät sekertarı C.Powell minemçä proyekt Parij belän Berlinneñ ütkändäge borçılularına cawap bulıp tora dip äytep( audio)
Min alarnıñ belderülärennän tögäl närsä teläwlären yä isä Ğıraq belän idaräne kemgä tapşırırğa cıyınuların añlamadım, çönki bu cawaplılıqnı bez ğıraqlılarğa tapşırabız
İminlek Şurasınıñ daimi äğzası Russiä dä , Fransiä belän Germaniägä quşılğan kebek kürenä. Bugen Taşkentta tışqı eşlär ministırı İgor İvanov AQŞ täqdime iqtibar cälep itüçe bulsa da, Mäskäü borçılularına cawap birüe öçen anıñ östendä bik küp eşläse bar dip söylägän.Xälbuki ütkän atna azağında V.Putin AQŞ komandasındağı xalıqara köçlärgä qatnaşu xata bulmas, ämma monıñ öçen İminlek Şurasınıñ mandatı kiräk dip beldergän ide. Fransiä tışqı eşlär ministırı Dominique de Villepin bugen Figaro gazetasında basılıp çıqqan ängämäsendä Waşington telägän xalıqara köçlär berençe urında Ğıraqnıñ yaña xökümätenä faydalı bulırğa tieş , iminlekne säyäsät häm ekonomik mäsälälärdän ayırıp bulmi ägär dä anda xalıqara köçlär urnaşaçaq ikän ul Ğıraqnıñ yaña xakimiätlärenä xezmät itärgä tieş dip äytkän. Dresden summitına qatnaşqan Villepin rezolutsiä proyektı turında Parij borçıluların telgä alıp , Ğıraqta säyäsi küçeş çorında BMOğa kübräk cawaplılıq birergä kiräk ,yaña proyekt älege qısalarnı nigezle räweştä üzgärtmi dip söyläde.
Schröderneñ xätta BMO mandatı belän dä Ğıraqqa ğäskär cibärügä qarşı buluı opozitsiä häm mätbuğat tarafınnan kisken tänqitlänä.Parij belän Mäskäü bälkim bu märtäbä uyında otu şansına iäbez dip qarıy torğandır.Söyläşülär başlana ğına .
färidä xämit, praga
färidä xämit, praga